„სილქნეტი“ აბონენტებს აფრთხილებს, რომ მათი პაკეტების საფასური შესაძლოა, გაიზარდოს. ამის შესახებ „სილქ ტი-ვის“ მომხმარებლებმა შეტყობინება მიიღეს, რომლის თანახმად, სამი ტელეკომპანია - „იმედი“, „რუსთავი 2“ და „მაესტრო“ არხების ჩვენებას ფასიანს ხდიან, რამაც შესაძლოა, „სილქნეტის“ ტარიფებზეც იმოქმედოს.
„გვსურს შეგატყობინოთ არასასიამოვნო სიახლე. „რუსთავი 2“, „იმედი“ და „მაესტრო“ აბონენტებისთვის საზიანოდ შეთანხმდნენ, რომ ფასიანი გახადონ მათი არხების ჩვენება, რამაც შეიძლება გააძვიროს პაკეტის ღირებულება“, - ნათქვამია განცხადებაში.
როგორც „საზოგადოებრივ მაუწყებელს“ „სილქნეტში“ განუცხადეს, მათ, სხვა საკაბელოებისა და ინტერნეტ გვერდების მსგავსად, შუამავალი კომპანიისგან მიიღეს შესაბამისი წერილი და ამ ეტაპზე მაუწყებლებთან ცდილობენ დეტალების გარკვევას.
„სილქნეტის“ განცხადებით, მათთვის უცნობია, რა თანხას მოითხოვს შუამავალი კომპანია არხების ტრანსლირების სანაცვლოდ და რამდენად შეიძლება გაიზარდოს მათი პაკეტების საფასური, თუმცა ვალდებულნი არიან, მომხმარებელები შესაძლო ცვლილების შესახებ წინასწარ ფააფრთხილონ.
