ფაქტია, რომ ქვეყნაში უმაღლესი თანამდებობის პირებს, შესაძლოა, თავს დაესხნენ და დამნაშავეები არ დაისაჯონ - ამის შესახებ ყოფილმა დეპუტატმა, პავლე კუბლაშვილმა ალადაშვილის სახელობის კლინიკაში განაცხადა, სადაც სახელმწიფო აუდიტის სამსახურის ხელმძღვანელის, ლაშა თორდიას მოსანახულებლად მივიდა.
კუბლაშვილის განცხადებით, ის საქმეზე მხოლოდ იმ ინფორმაციას ფლობს, რასაც თავად დაზარალებული ავრცელებს.
„მე იმ ინფორმაციას ვფლობ საქმესთან დაკავშირებით, რაზეც დაზარალებული საუბრობს, თუმცა ფაქტია, რომ ქვეყნაში დაუსჯელობის სინდრომი დამკვიდრდა - უმაღლესი თანამდებობის პირებს, შესაძლოა, თავს დაესხნენ და დამნაშავეები არ დაისაჯონ“, - განაცხადა კუბლაშვილმა.
კუბლაშვილის განცხადებით, როგორც მისთვის არის ცნობილი, ლაშა თორდია ოთარ ფარცხალაძეს არ იცნობდა და მომხდარი, მისი აზრით, თორდიას საქმიანობას უკავშირდება.
მისივე განცხადებით, საქმის ობიექტური გამოძიების იმედი არ აქვს.
სახელმწიფო აუდიტის სამსახურის ხელმძღვანელს ფიზიკური შეურაცხყოფა 12 მაისს მიაყენეს. თორდიას განცხადებით, მას ყოფილი მთავარი პროკურორი ოთარ ფარცხალაძე და მასთან ერთად მყოფი რამდენიმე პირი დაესხა თავს.
