პროფკავშირები გარდაცვლილი მეშახტეების გამო 14 მაისს ტყიბულში სამგლოვიარო მარშს გამართავს. ამის შესახებ საქართველოს პროფესიული კავშირების გაერთიანების თავმჯდომარე ირაკლი პეტრიაშვილმა ჟურნალისტებს განუცხადა.
მისი თქმით, ამ ყველაფერში დამნაშავეა ყველა ის პირი, ვინც წლების განმავლობაში ეწინააღმდეგებოდა შრომის ინსპექციის შექმნასთან.
„იძიონ, წერონ და იკითხონ - ამ ყველაფერში დამნაშავე გამოკვეთილია. ყველა ის პირია დამნაშავე, რომლებმაც წლების განმავლობაში ჩვენი მოთხოვნა არ გაითვალისწინა უსაფრთხოების ნორმებთან დაკავშირებით, შრომის ინსპექციის შექმნასთან დაკავშირებით. სათავეს აქედან იღებს ის სითავხედე, რასაც დამსაქმებლები დასაქმებულებთან მიმართებაში, რასაც სამუშო ადგილებზე სჩადიან. ფაქტია, რომ შახტის ლიფტის არ ჰქონდა დამცავი საშუალება. ფაქტია, რომ პერიმეტრზე 400 მეტრზე ჰაერში გამოკიდებულები ეს ადამიანები მუშაობდნენ ყოველგვარი დამცავი ქამრების გარეშე. ამ ყველაფრის სათავე არის იქ, სადაც შრომის ინსპექციის იგნორირება ხდება, სადაც შრომის ნორმებთან დაკავშირებით ბიზნესის შიშებზეა დაფუძნებული საქართველო, რომელიც ბიზნეს-სექტორის ხელში ერთ პატარა კომპანიას დაემსგავსა და ბიზნესის დიქტატით მიმდინარეობს ყველაფერი საქართველოში. პრობლემების სათავე აქ არის. ასეთი შემთხვევები უამრავი გვაქვს და კიდევ გვექნება. კიდევ გაგრძელდება, რადგან არის ომი დასაქმებული ადამიანების წინააღმდეგ“, - განაცხადა პეტრიაშვილმა.
როგორც მან აღნიშნა, პროფკავშირები მეშახტეების გარდაცვალების გამო გლოვის დღედ გამოცხადებას ითხოვდა. მისივე თქმით, გარდაცვლილთა დაკრძალვის შემდეგ კი პროფკავშირები სამგლოვიარო მარშს გამართავს.
