მედიის თავისუფლების საკითხებში ეუთო-ს წარმომადგენლის ოფისის ორგანიზებით ქ. თბილისში სამხრეთ კავკასიის მედიაკონფერენცია გაიხსნა. საქართველო უკვე მეოთხე წელია, მასპინძლობს ეუთო-ს მედია ღონისძიებას.
წლევანდელი კონფერენციის თემაა "ყალბი ინფორმაცია, დეზინფორმაცია და მედიის თავისუფლება". ღონისძიებაში ტრადიციულად მონაწილეობას იღებენ საქართველოს, აზერბაიჯანისა და სომხეთის მთავრობების, სამოქალაქო საზოგადოების, მედიისა და აკადემიური წრეების წარმომადგენლები.
აღსანიშნავია, რომ კონფერენციის გახსნაზე სიტყვით გამოვიდა საქართველოს საგარეო საქმეთა მინისტრის მოადგილე - ხათუნა თოთლაძე, რომელიც მიესალმა ეუთო-ს ეგიდით მედია კონფერენციის საქართველოში ჩატარების პრაქტიკას. მან ხაზი გაუსვა საქართველოსა და მედიის თავისუფლების საკითხებში ეუთო-ს წარმომადგენლის ოფისთან არსებულ მჭიდრო და ნაყოფიერ თანამშრომლობას. ხათუნა თოთლაძემ ასევე ისაუბრა უკანასკნელ წლებში ქვეყანაში მედიის თავისუფლების კუთხით მიღწეული პროგრესის შესახებ.
