1-7 მაისს თურქეთში, ქალაქ აფიონკარაჰისარის სახელმწიფო უნივერსიტეტში (AKU), ჩატარდა საერთაშორისო საგანმანათლებლო კვირეული ERASMUS+ - ის ფარგლებში. ღონისძიებაში მონაწილეობა მიიღეს საქართველოს, მალაიზიის, ბოსნია-ჰერცოგოვინის, კოსოვოს, ყირგიზეთის, უკრაინისა და თურქეთის წამყვანი უნივერსიტეტების პროფესორ-მასწავლებლებმა.
საერთაშორისო პროექტის კვირეულში საქართველოს ტექნიკური უნივერსიტეტის წარმომადგენლებმა - ნინო კუპრაშვილმა, მარიკა ზვიადაძემ, ანასტასია ფუტკარაძემ, ნიკოლოზ ბრეგვაძემ, ნინო ცომაიამ და ემზარ ფაჟავამ - ERASMUS+ - ის პროექტის მონაწილე უნივერსიტეტების დელეგაციებს გააცნეს სტუ-ში მიმდინარე პროცესები. ასევე, სტუ-ს დელეგაციის წევრები დაესწრნენ თურქეთის უნივერსიტეტის მიერ ჩატარებულ ტრეინინგებს, რომლებიც ეხებოდა გაცვლით პროგრამებს და სამომავლო ურთიერთთანამშრომლობას, მობილობას უნივერსიტეტებს შორის.
„აფიონკარაჰისარში, ERASMUS+ - ის პროგრამის ფარგლებში მსგავსი კვირეული წელიწადში ერთხელ ტარდება. საქართველოს ტექნიკური ყოველ წელს ღებულობს პროექტში მონაწილეობას. ჩვენ შესაძლებლობა გვეძლევა, კოლეგებს სხვადასხვა ქვეყნის წამყვანი უნივერსიტეტებიდან გავაცნოთ სტუ-ში მიმდინარე პროცესები, წარვუდგინოთ პრეზენტაციები ჩვენი ქვეყნის სესახებ. წლევანდელი კვირეული გამორჩეული იყო წინა წლებისაგან იმით, რომ წელს ჩვენმა დელეგაციამ ფურორი მოახდინა. დიახ, სწორედაც რომ ფურორი! სემინარების შემდეგ, თურქული ეროვნული საკრავების მუზეუმში გაიმართა გაცნობითი ხასიათის კულტურულ ღონისძიებები, სადაც ჩვენ შევძელით და ქართული ფოლკლორი ისე წარმოვადგინეთ, რომ მაყურებლებმა აღფრთოვანება ვერ დამალეს, იყო ხანგრძლივი ოვაცია და მინდა გითხრათ, რომ ეს იყო ყველაზე სასიამოვნო მომენტი“, - გვითხრა საქართველოს ტექნიკური უნივერსიტეტის საზოგადოებასთან ურთიერთობის დეპარტამენტის წარმომადგენელმა ნინო კუპრაშვილმა.
