„ევროპული საქართველოს“ წევრი ზურაბ ჭიაბერაშვილი კონსტიტუციის პროექტის განხილვისას პარლამენტის თავმჯდომარე ირაკლი კობახიძეს დაუპირისპირდა. იგი კობახიძის განცხადებას გამოეხმაურა, რომელმაც მათემატიკასა და პოლიტიკაზე ისაუბრა.
“თქვენ სერგი კაპანაძეს დაუწუნეთ მათემატიკა, მაგრამ მე მინდა დავსვა შეკითხვა და მიპასუხოს ამ დარბაზში ვინმემ - რა მათემატიკა იდგა იმის უკან, რომ გაზის ტარიფი 25 თეთრი უნდა გამხდარიყო? რა მათემატიკა იდგა ამ ყველაფრის უკან? მე მესმის თქვენი აღშფოთება, მაგრამ კარგად უნდა გვესმოდეს, რა სიტყვები არის "უპასუხისმგებლობა" და "დემაგოგია",- განაცხადა ჭიაბერაშვილმა.
პარლამენტის თავმჯდომარემ საუბრისას განაცხადა, რომ მმართველ გუნდს კონსტიტუციის პროექტზე ვენეციის კომისიის დადებითი დასკვნის იმედი აქვს.
"ჩვენ ის მათემატიკა გვაქვს, რომელსაც სრულიად მსოფლიო იზიარებს და ამ მათემატიკას ვენეციის კომისია უახლოეს მომავალში დაადასტურებს. საზოგადოებას კონკრეტულ ციფრებს და რიცხვებს სწორად ვაწვდით. რაც შეეხება ოპონენტებს, ისინი საზოგადოების მანიპულირებას მარტივად ცდილობენ იმ ციფრებით, რაზეც ისინი საუბრობენ. რეალურად, იმ მათემატიკაზე ვსაუბრობთ, რაც მთელ მსოფლიოშია დამკვიდრებული", - განაცხადა კობახიძემ.
