საქართველომ თურქეთის წინააღმდეგ ევროსაბჭოს საპარლამენტო ასამბლეის რეზოლუციას მხარი არ დაუჭირა. არსებული ინფორმაციით, რეზოლუციას 113 მომხრე და 45 წინააღმდეგი ჰყავდა.
სხდომაზე ასამბლეის წევრები თურქეთში ჩატარებული რეფერენდუმის შედეგებს და იმ ცვლილებებს აპროტესტდებდნენ, რომლებიც ქვეყნის კანონმდებლობაში ხორციელდება.
ევროპის საბჭოს საპარლამენტო ასამბლეის გადაწყვეტილების საპასუხოდ თურქეთის საგარეო საქმეთა სამინისტრომ განცხადება გაავრცელა.
თურქეთმა ევროპის საბჭოს გადაწყვეტილებას უსამართლო და პოლიტიკურად მოტივირებული უწოდა.
განცხადებაში ასევე წერია, რომ თურქეთი იცავს საერთაშორისო შეთანხმებებს, იღებს საჭირო და აუცილებელ ზომებს იმ საფრთხეების წინააღმდეგ, რომლებიც კონსტიტუციურ წესრიგს ემუქრება.
"ჩვენი ქვეყანა უპირისპირდება ყველაზე მკაცრ ტერორისტულ ორგანიზაციებს, ისეთებს როგორებიცაა PKK, FETO და DAESH. აღსანიშნავია, რომ ჩვენ ვიცავთ საერთაშორისო შეთანხმებებს, ვიღებთ საჭირო და აუცილებელ ზომებს იმ საფრთხეების წინააღმდეგ, რომლებიც ემუქრება კონსტიტუციურ წესრიგს. უნდა აღინიშნოს, რომ თურქეთი ხელს უწყობს მთელი ევროპის უსაფრთხოებასა და სტაბილურობას და მასპინძლობას უწევს 3.2-მდე მილიონ დევნილს, ასევე წინააღმდეგობას უწევს ტერორისტულ ორგანიზაციებს.
თუ გავითვალისწინებთ თურქეთის მხრიდან ევროპულ უსაფრთხოებასა და სტაბილურობაზე ზრუნვას, ამ ფონზე ევროპის საბჭოს საპარალამენტო ასამბლეის მიერ მიღებული გადაწყვეტილება, აჩვენებს, რომ ასამბლეა არ იცავს იმ დემოკრატიულ ღირებულებებს, რომლებსაც ეფუძნება ევროპა.
მიუხედავად ასეთი უსამართლო და პოლიტიკურად მოტივირებული გადაწყვეტილებისა, რომელიც ევროპის საბჭოს საპარლამენტო ასამბლეამ მიიღო, თურქეთი გააგრძელებს თავის მცდელობას, რომ დაიცვას საკუთარი მოქალაქეების უფლებები და თავისუფლება დემოკრატიული სტანდარტების, ადამიანის უფლებებისა და საერთაშორისო შეთანხმებების დარღვევის გარეშე", - ნათქვამია თურქეთის საგარეო საქმეთა სამინისტროს მიერ გავრცელებულ განცხადებაში.
