ბანკი „ქართუ“ პარტია „ნაციონალურ მოძრაობას“ ცილისწამებაში სდებს ბრალს და სასამართლოში ჩივილს აპირებს.
დღეს საპროტესტო აქციაზე „ნაციონალური მოძრაობის“ წევრება შპს „ქართულ საინვესტიციო ჯგუფ XXI”-ის თანამშრომლებს სოლიდარობა გამოუცხადეს. მათი თქმით, ტაქსის კომპანიასთან ჰქონდათ ხელშეკრულება, რომ საფასურის გადახდის შემდგომ კომპანიის მანქანები მათ საკუთრებაში გადავიდოდა. კომპანიამ აღნიშნული მანქანები ბანკის სესხის ასაღებად გამოიყენა, შემდეგ კი ვერ გადაიხადა და ყადაღა დაედო.
"სესხის უზრუნველსაყოფად დაგირავებულია უძრავი ქონება და ავტომობილები. 2016 წელს აღნიშნულმა კომპანიამ სასამართლოსთვის მიმართვის გზით დაიწყო გაკოტრების პროცესი, რაც გულისხმობს ყველა კრედიტორის, მათ შორის ბანკის ჩართულობას დარჩენილი დავალიანების ამოღებას. ბანკს შესაბამისი სარჩელით მოთხოვნილი აქვს საკრედიტო დავალიანების დაფარვა მხოლოდ მესამე პირის საკუთრებაში არსებული, ბანკის სასარგებლოდ დატვირთული უძრავი ქონების რეალიზაციით, რომლის ღირებულებაც აღემატება არსებულ დავალიანებას. კომპანიის საკუთრებაში არსებულ, გირავნობით უზრუნველყოფილ საგნებთან (ავტოსატრანსპორტო საშუალებებთან) დაკავშირებით ბანკს მოთხოვნები არ დაუყენებია (გაკოტრების პროცესში ვერც დააყენებდა) სასამართლოში, შესაბამისად, სააღსრულებო პროცედურები კომპანიის მიმართ ბანკის მოთხოვნის საფუძველზე არ მიმდინარეობს და ბანკის მოთხოვნის საფუძველზე ყადაღა არ ადევს გირავნობით უზრუნევლყოფილ საგნებს“- ნათქვამია ბანკის მიერ გავრცელებულ განცხადებაში. მათი თქმით, ამჯერად პარტიას მოუწევს პასუხისგება და სასამართლოს წინაშე წარდგომა.
