„ჩვენ გვაქვს დღის წესრიგი. ამ დღის წესრიგის მიხედვით, აპრილის ბოლოს მომზადდება უკვე კონკრეტული დოკუმენტი და ის დოკუმენტი პასუხს გასცემს ყველა კითხვას, რომელიც არის დასმული“, - ეს განცხადება პარლამენტისა და საკონსტიტუციო კომისიის თავმჯდომარე ირაკლი კობახიძემ არასაპარლამენტო ოპოზიციის მოთხოვნის საპასუხოდ გააკეთა.
კობახიძის განცხადებით, საკონსტიტუციო კომისიაში წარმოდგენილია ყველა კვალიფიციური პარტია და მათ აქვთ სრული შესაძლებლობა, მონაწილეობა მიიღონ კომისიის მუშაობაში. მისივე თქმით, კვალიფიციურ პარტიებს აქვთ შესაძლებლობა, გამოთქვან თავისი მოსაზრებები და ამ მოსაზრებების დიდი ნაწილი უკვე ასახულია პროექტში.
„კომისიაში არის წარმოდგენილი 73 წევრი, მათ შორის ყველა კვალიფიციური პარტია, მათ აქვთ სრული შესაძლებლობა მონაწილეობა მიიღონ კომისიის მუშაობაში. კომისიას აქვს თავისი დღის წესრიგი. ამ დღის წესრიგის თანახმად გაიმართება დისკუსიების მესამე რაუნდი, რის შემდეგაც ჩვენ არამარტო ჩვენ მოსაზრებებს, არამედ უკვე კონკრეტულ პროექტს წარვუდგენთ კომისიის პლენარულ სხდომას და უკვე აპრილის ბოლოს დამტკიცდება საბოლოო დოკუმენტი, რომელიც ინიციატივის სახით იქნება შეტანილი საქართველოს პარლამენტში. ჩვენ გვაქვს დღის წესრიგი. ამ დღის წესრიგის მიხედვით, აპრილის ბოლოს მომზადდება უკვე კონკრეტული დოკუმენტი და ის დოკუმენტი პასუხს გასცემს ყველა კითხვას, რომელიც არის დასმული. კვალიფიციურ პარტიებს აქვთ შესაძლებლობა, გამოთქვან თავისი მოსაზრებები და ამ მოსაზრებების დიდი ნაწილი უკვე ასახულია პროექტში“, - განცახადა ირაკლი კობახიძემ.
შეგახსენებთ, არასაპარლამენტო ოპოზიციამ დღეს მიმართვა გაავრცელა. 15 არასაპარლამენტო ოპოზიციური პარტია მმართველი პარტიისაგან ითხოვს, არაუგვიანეს 2017 წლის 15 აპრილისა საჯაროდ გამოაქვეყნოს საკუთარი პოზიცია კონსტიტუციური რეფორმის რამდენიმე კონკრეტულ საკითხზე.
პარტიებმა პარლამენტის თავმჯდომარისა და სახელმწიფო საკონსტიტუციო კომისიის ხელმძღვანელის ირაკლი კობახიძის, ასევე “ქართული ოცნების“ ლიდერისა და პრემიერ-მინისტრის გიორგი კვირიკაშვილის, ევროპის საბჭოს, ევროპარლამენტის და საქართველოში აკრედიტებულ დიპლომატიურ მისიების სახელზე სპეციალური მიმართვა შეიმუშავეს.
მიმართვაში აღნიშნულია, რომ დღემდე სახელმწიფო საკონსტიტუციო კომისიის მუშაობის პროცესში არ იქნა გაზიარებული არც ერთი ოპოზიციური პარტიის არც ერთი წინადადება და შენიშვნა.
ამასთან, მოგვიანებით, არასაპარლამენტო ოპოზიციის წარმომადგენელმა გიორგი ახვლედიანმა განაცხადა, რომ თუ ხელისუფლება ოპოზიციის მოთხოვნებს არ გაითვალისწინებს, შესაძლოა, არასაპარლამენტო ოპოზიციამ საკონსტიტუციო კომისიაში მუშაობას ბოიკოტი გამოუცხადოს.
