საქართველოს პრეზიდენტმა მიხეილ სააკაშვილმა თბილისის მერ გიგი უგულავასთან და საკრებულოს მმართველი გუნდის წევრებთან შეხვედრისას დედაქალაქის განვითარების გრანდიოზული გეგმა წარადგინა.
პრეზიდენტმა თბილისში მომავალში დაგეგმილ და უკვე რეალიზებულ პროექტებზედაც ისაუბრა. მისი განცხადებით, მომავალში თანამედროვე ჩქაროსნული ტრამვაის ხაზის მშენებლობა იგეგმება, რაც დედაქალაქში ტრანსპორტის პრობლემას საბოლოოდ მოხსნის.
"ვაშენებთ ესტაკადას, რომელიც მალე დასრულდება, ასევე ხიდს ვეფხისა და მოყმის ძეგლთან, რომელიც ყველაზე დიდი ხიდი იქნება თბილისში და ეს ხიდი მოძრაობის განმუხტვას უზრუნველყოფს. ჩქარი ტრამვაის გაკეთება წლების საკითხია, ეს ასეულობითმილიონიანი პროექტია, თუმცა საერთაშორისო საფინანსო ინსტიტუტების დახმარებით უნდა შევძლოთ ამის გაკეთება და ისევე, როგორც სტრასბურგში, ბორდოში, თბილისშიც იქნება ჩქარი ტრამვაი. ამით საბოლოოდ მოიხსნება ტრანსპორტის პრობლემა თბილისში", _ განაცხადა სააკაშვილმა.
