საფინანსო-საბიუჯეტო კომიტეტის სხდომაზე საქართველოს კანონის პროექტი „ელექტრონული დოკუმენტისა და ელექტრონული სანდო მომსახურების შესახებ" და მისგან გამომდინარე კანონპროექტები განიხილეს.
მომხსენებლის, საქართველოს იუსტიციის მინისტრის პირველი მოადგილის, ალექსანდრრე ბარამიძის განცხადებით, კანონპროექტი პრინციპულ სიახლეს მოიცავს. თანმდევ პროექტთა პაკეტში კი შესაბამისი ტექნიკური ცვლილებებია ასახული.
„შემოთავაზებული კანონპროექტით საქართველოს კანონმდებლობა ევროკავშირის კანონმდებლობასთან მოდის შესაბამისობაში. ელექტრონული ხელმოწერისა და სხვა სანდო მომსახურების გამოყენების სამართლებრივი მექანიზმები განისაზღვრება და მათი საშუალებით ელექტრონული მმართველობის, ელექტრონული ბიზნესის განვითარებისა და სხვა მიმართულებების ხელშეწყობა მოხდება", - განაცხადა ალექსანდრე ბარამიძემ.
კანონპროექტის თანახმად, ქვეყნის მასშტაბით ელექტრონული დოკუმენტი და ელექტრონული სანდო მომსახურება უფრო ფართოდ გავრცელდება. მოქმედი კანონისგან განსხვავებით, რომელიც ელექტრონულ დოკუმენტზე უარის თქმის საშუალებას უზღუდავდა მხოლოდ სასამართლოს, წარმოდგენილი რედაქცია, პრაქტიკულად, ავალდებულებს საჯარო უფლებამოსილების განმახორციელებელ ორგანოებს, უარი არ თქვან ელექტრონულ დოკუმენტზე მხოლოდ იმ მოტივით, რომ ის წარდგენილი არ არის მატერიალური ფორმით (ქაღალდური სახით). ამასთან, ელექტრონული დოკუმენტის გამოყენება შესაძლებელია ყველა იმ შემთხვევაში, როდესაც მოითხოვება დოკუმენტის წერილობითი ფორმა, თუ კანონით სხვა რამ არ არის დადგენილი.
იუსტიციის მინისტრის პირველმა მოადგილის განცხადებით, ახალი კანონის იდეა სწორედ ისაა, რომ ელექტრონული ხელმოწერის ცნებას ის აბსოლუტურად სხვანაირად ითვალისწინებს და განმარტავს. მისივე თქმით, ელექტრონულ დოკუმენტბრუნვაში ჩართულ პირებს უნიკალურ ბინარულ კოდს ე.წ. სანდო მომსახურების მიმწოდებელი გადასცემს. რაც შეეხება სანდო მომსახურების მიმწოდებელს, ალექსანდრე ბარამიძის განცხადებით, კანონით გაწერილია, რომ სანდო სერვისების მიმწოდებელმა უნდა გაიაროს ავტორიზაცია იუსტიციის სამინისტროს სსიპ მონაცემთა გაცვლის სააგენტოში.
სახელმწიფო, ასევე, ახორციელებს ზედამხედველობას მის მიერ უკვე ავტორიზებულ პირებზე, რათა მათ სანდო მომსახურებები იმ მოთხოვნების შესაბამისად განახორციელონ, რომელსაც სახელმწიფო დაადგენს. მოთხოვნები ტექნიკურ რეგლამენტში გაიწერება, რომელიც სრულ შესაბამისობაში იქნება ევროპულ დირექტივებთან.
კანონპროექტის თანახმად, კვალიფიციურ ელექტრონულ ხელმოწერას ისეთივე იურიდიული ძალა აქვს, როგორიც მატერიალურ დოკუმენტზე მატერიალურ ხელმოწერას.
იუსტიციის მინისტრის პირველი მოადგილის განცხადებით, უკანასკნელი წლების განმავლობაში, საქართველომ ელექტრონული დოკუმენტბრუნვის მიმართულებით, მნიშვნელოვან წარმატებას მიაღწია.მომხსენებელმა კომიტეტის წევრების შეკითხვებსაც უპასუხა.კომიტეტმა წარმოდგენილ კანონპროექტთა პაკეტს მხარი დაუჭირა.
