პარლამენტის თავმჯდომარის პირველი მოადგილე, თამარ ჩუგოშვილი და პარლამენტის ევროპასთან ინტეგრაციის კომიტეტის თავმჯდომარე, თამარ ხულორდავა აშშ-ში ვიზიტის ფარგლებში რესპუბლიკელ სენატორ, ჯონ ბუზმანს 6 თებერვალს შეხვდნენ.
ქართულმა მხარემ სენატორს ქვეყნის წინაშე არსებული უსაფრთხოების გამოწვევების თაობაზე ინფორმაცია მიაწოდა და ხაზი გაუსვა ამერიკელი კანონმდებლების როლს აშშ-ის ახალ ადმინისტრაციასთან საქართველოს მხარდაჭერის გაძლიერების საქმეში, რათა ორმხირივი პარტნიორობა ახალ საფეხურზე გადავიდეს.
სენატორმა ბუზმანმა ხაზი გაუსვა საქართველოს დემოკრატიულ რეფორმებს და აღნიშნა, რომ საქართველო არის გამორჩეული ქვეყანა საერთაშორისო უსაფრთხოებაში, მათ შორის ავღანეთის ნატოს მისიაში შეტანილი წვლილის გამო. მან საქართველოს რეგიონში დემოკრატიული განვითარების მაგალითი და აშშ-ის გამორჩეული პარტნიორი უწოდა და ყველა მიმართულებით ქვეყნის სრული მხარდაჭერა დაადასტურა.
აშშ-ში სამუშაო ვიზიტის ფარგლებში პარლამენტის თავმჯდომარის პირველმა მოადგილემ, თამარ ჩუგოშვილმა და ევროპასთან ინტეგრაციის კომიტეტის თავმჯდომარემ, თამარ ხულორდავამ შეხვედრები გამართეს საერთაშორისო რესპუბლიკური ინსტიტუტის (IRI), ეროვნულ-დემოკრატიული ინსტიტუტის (NDI) და ეროვნული წვლილი დემოკრატიისთვის (NED) ხელმძღვანელებთან.
შეხვედრებზე მხარეებმა განიხილეს ქვეყანაში მიმდინარე რეფორმები, ორმხრივი ურთიერთობები და ამ კუთხით საქართველოს პარლამენტის როლი და მნიშვნელობა. კვლევითი ცენტრების წარმომადგენლებმა საქართველოს პროდასავლურ ინტერესებს გაუსვეს ხაზი. საუბარი, ასევე, შეეხო საქართველოს პარლამენტის გაძლიერებას, განსაკუთრებით ანალიტიკური მიმართულებით პოლიტიკური გადაწყვეტილებებისა და საკონონმდებლო ინიციატივების მიღების პროცესში. ამ კუთხით ამერიკულმა მხარემ საქართველოს პარლამენტის დახმარების ინტერესი გამოხატა.
ვიზიტის პირველი დღე აშშ-ში საქართველოს საელჩოს ორგანიზებული ღვინის დეგუსტაციის ღონისძიებით დასრულდა, რომელსაც თამარ ჩუგოშვილის ხელმძღვანელობით საქართველოს საპარლამენტო დელეგაციასთან ერთად ასევე დაესწრნენ კოლეგა კონგრესმენები. ღონისძიებას დემოკრატი კონგრესმენი დუნკან ჰანტერი მასპინძლობდა. სტუმრები საქართველოს უძველეს კულტურას გაეცნენ და ქართული ალკოჰოლური სასმელები დააგემოვნეს.