კომერციულ ბანკებს სავალუტო სესხების გალარების წინადადებით 5000-ზე მეტმა ადამიანმა მიმართა, მათგან, 250-ზე მეტმა საკუთარი სესხი უკვე გაალარა. საქართველოს ბანკების ასოციაციის პრეზიდენტ ზურაბ გვასალიას განცხადებით, კომერციულმა ბანკებმა მათთვის გამოყოფილი 5 სამუშაო დღის განმავლობაში გალარების ყველა პოტენციურ მონაწილეს შეატყობინეს პროგრამაში მათი მონაწილეობის შესახებ.

„გალარება ერთჯერადი და დროით შემოფარგლული პროგრამაა. ამდენად, მნიშვნელოვანია, რომ მის ყველა პოტენციურ მონაწილეს მიეცეს შესაძლებლობა, საკუთარი სადოლარე სესხი ლარში გადაიყვანოს. ბუნებრივია, საბოლოო გადაწყვეტილება მსესხებელმა უნდა მიიღოს, თუმცა, დარწმუნებული ვარ, თითოეული მსესხებლისთვის კომერციულ ბანკებს შორის დიდი კონკურენცია იქნება, მით უფრო, რომ პროგრამის მონაწილეებს შეუძლია მომსახურე ბანკის შეცვლა და სესხის იქ გალარება, სადაც უკეთეს პირობებს შესთავაზებენ. ამაზე მეტყველებს ის ფაქტი, რომ საშუალო პროცენტი, რომელიც გალარებისას დაფიქსირდა, საბაზროა და 10-11 პროცენტის ფარგლებში მერყეობს,“ - განაცხადა ბანკების ასოციაციის პრეზიდენტმა ზურაბ გვასალიამ. მისი თქმით, გალარების პროგრამაში მონაწილეობა მსესხებელს საშუალებას აძლევს, სავალუტო კურსზე დამოკიდებული არ იყოს და  შეძლოს საკუთარი შემოსავლის განკარგვის პროგნოზირება.   

სესხების გალარების პროგრამა 17 იანვარს დაიწყო. ის 2 თვე გაგრძელდება. ამ ხნის მანძილზე ის ფიზიკურ პირებს, რომელთაც ის შეეხებათ, შეეძლებათ საკუთარი სადოლარე სესხების ლარში გადატანას შეღავათიანი პირობებით.