ევროკავშირის დახმარების პროექტის ფარგლებში, საქართველოს კონკურენციის სააგენტოში, ორი წლის განმავლობაში, ევროპელი ექსპერტები აურელიო ლა ტორე და ფრანსუა სუტი, ქართველ კოლეგებთან ერთად იმუშავებენ.
„სტაბილური ბიზნესის, საინვესტიციო გარემოს გაძლიერების მიზნით, კონკურენციის სააგენტოში ახალი პროექტი იწყება, რომელიც ხელს შეუწყობს სააგენტოს ეფექტურ მუშაობას და კონკურენციის პოლიტიკის გაუმჯობესებას. ჩვენი მთავარი მიზანია სწრაფი, კონკრეტული ქმედებებით გავაუმჯობესოთ კონკურენციის სააგენტოს სამართლებრივი, ეკონომიკური და ტექნიკური შესაძლებლობების არეალი, თანამშრომელთა პროფესიული შესაძლებლობები, კონკურენციის სააგენტოსა და დარგობრივ მარეგულირებლებს შორის ურთიერთთანამშრომლობის საკითხები. ჩვენ უნდა გავიზიაროთ საერთაშორისო გამოცდილება და მიდგომები. შევქმნათ ახალი, საინტერესო, დროული და საჭირო, ჩვენი ხალხის, ქვეყნის ინტერესებზე მორგებული მნიშვნელოვანი ამოცანები, რაც თავადვე უნდა ამოვხსნათ და ჩვენ წინაშე არსებული პრობლემები დავძლიოთ“, - განაცხადა საქართველოს კონკურენციის სააგენტოს თავმჯდომარემ და ექსპერტებს ნაყოფიერი, წარმატებული, შედეგზე ორიენტირებული საქმიანობა უსურვა.
