ლიტველი ვიზიტორები საზღვაო დასვენების გარდა სამთო, ეკო და გასტრონომიული ტურებით ინტერესდებიან, აცხადებს აჭარის ტურიზმის დეპარტამენტის წარმომადგენელი მიხეილ კოპლატაძე, რომელიც ვილნიუსში მიმდინარე საერთაშორისო ტურისტულ გამოფენა „Adventur 2017”-ში იღებს მონაწილეობას.
აღნიშნულ გამოფენაში აჭარის ტურიზმის დეპარტამენტი საქართველოს ტურიზმის ეროვნულ ადმინისტრაციასთან და მთის კურორტების განვითარების კომპანიასთან ერთად მონაწილეობს.
საქართველოს სტენდი გამოფენაზე საპატიო სტუმრის სტატუსით იყო წარმოდგენილი და გამოფენის გახსნისას ის ქალაქ კლაიპედას მერმა და ეკონომიკის მინისტრმა მოინახულეს. აჭარის სტენდთან ვიზიტორებს საშუალება ჰქონდათ რეგიონის ტურისტული პოტეციალის შესახებ მომზადებულ სარეკლამო-საინფორმაციო მასალებს გაცნობოდნენ და დეტალური ინფორმაცია მიეღოთ აჭარაში გავრცელებული ტურიზმის სახეობების, პროდუქტებისა და დასვენების შესაძლებლობების შესახებ. აჭარის ტურიზმის დეპარტამენტი რეგიონს რეკლამირებას ლიტვის საერთაშორისო ტურისტულ გამოფენაზე 2013 წლიდან უწევს.
“აჭარის და ზოგადათ, საქართველოს მიმართ ინტერესი გამოფენაზე დიდია. გამოფენის ფარგლებში ჩვენ არაერთი საქმიანი შეხვედრა გავმართეთ ჩვენს პარტნიორებთან სამომავლო თანამშრომლობის მიზნით და ვფიქრობ, მსგავს გამოფენებში მონაწილეობა რეგიონის რეკლამირებას საერთაშორისო ბაზარზე კიდევ უფრო შეუწყობს ხელს,“ განაცხადა აჭარის ტურიზმის დეპარტამენტის წარმომადგენელმა მიხეილ კოპლატაძემ.
აჭარის ტურიზმის დეპარტამენტს „Adventur 2017”-ში მონაწილეობისა და თანამშრომლობისთვის მადლობის სიგელი გადაეცა. მიმდინარე წელს, გამოფენაში მსოფლიოს სხვადასხვა ქვეყნიდან 230 ტურისტული კომპანია და ორგანიზაცია მონაწილეობდა. წლიდან წლამდე მზარდია ვიზიტორთა რაოდენობაც. წელს, გამოფენაზე წარმოდგენილი კომპანიების ტურისტულ პროდუქტებს 24 787 ადამიანი გაეცნო. აჭარის ტურიზმის დეპარტამენტი წლის ბოლომდე რეგიონის ტურისტული შესაძლებლობების რეკლამირებას 20-მდე საერთაშორისო ტურისტულ გამოფენაზე გეგმავს. გარდა უკვე არსებული ტრადიციული სარეკლამო ქვეყნებისა, ახალი ბაზრების აღმოჩენის მიზნით დეპარტამენტი მონაწილეობას მიიღებს გერმანიის, ლონდონის, იაპონიის, სეულისა და დუბაის საერთაშორისო გამოფენებში.
