მიმდინარე წელს ავიაკომპანია Orenburzhye კრასნოდარიდან და სოჭიდან საქართველოს რამდენიმე ქალაქის, მათ შორის ოკუპირებული სოხუმის მიმართულებით ფრენების განხორციელებას გეგმავს.
როგორც trn-news.ru წერს, საუბარია კრასნოდარი-თბილისის, კრასნოდარი-ბათუმის, კრასნოდარი-ქუთაისის, სოჭი-ბათუმისა და სოჭი-ქუთაისის მიმართულებით ფრენების დაწყებაზე.
abkhazeti.info კი აღნიშნავს, რომ საერთაშორისო ფრენებზე სუბსიდიების გაუქმების შემდეგ, ავიაკომპანია ”ორენბურჟიემ” (Orenburzhye ) შესაძლოა ოკუპირებულ აფხაზეთში რეისები შეასრულოს.
მას შემდეგ რაც ცნობილი გახდა, რომ ორენბურგის ავიაგადამყვანი სუბსიდირების სახელმწიფო პროგრამაში ვერ მოხვდა, ავიაკომპანიამ განაცხადა, რომ არსებულ ფასებს შეინარჩუნებდა, თუმცა შეცვლიდა ფრენების სიხშირეს.
ამასთან ავიაკომპანიის პირველი ”უცხოური” მიმართულება ოკუპირებული აფხაზეთი იქნება, სადაც ფრენებს კრასნოდარიდან განახორციელებენ.
”განიხილება ფრენების პროგრამის გაფართოება კრასნოდარიდან და სოჭიდან უცხოეთის მიმართულებით”, - ნათქვამია კომპანიის განცხადებაში.
სოხუმის აეროპორტის დირექტორის ვიაჩესლავ ეშბას თქმით, ასეთი გეგმები ნაადრევია. მისი აზრით, უნდა დაელოდონ რუსეთის ავიაციის ოფიციალურ განცხადებას.
როგორც ცნობილია სოხუმის ეროპორტი დახურულია ქართული მხარის მიერ მასზე სრული კონტროლის განხორციელების შეუძლებლობის გამო. იმ შემთხვევაში თუ ავიაკომპანია მაინც განახორციელებს ფრენებს სოხუმში, მაშინ ის დაარღვევს საქართველოს კანონს "ოკუპირებული ტერიტორიების შესახებ“.
თბილისმა არაერთხელ მიმართა სამოქალაქო ავიციის საერთაშორისო ორგანიზაციას (ICAO) სოხუმის აეროპორტის დახურვის მოთხოვნით.
2010 წელს ორგანიზაციაში განაცახდეს, რომ სოხუმის აეროპორტს საერთაშორისო სტატუსი არ ექნებოდა და პირობა დადეს, რომ აეროპორტს საერთაშორისო ავიარეისების განხორცილებისთვის საერთაშორისო კოდი არ მიენიჭება.
აღსანიშნავია, რომ ავიაკომპანია Orenburzhye ორენბურგის აეროპორტშია ბაზირებული და ფლობს თვითმფრინავებს: «АН-2» და «Let L410».
