საპარლამენტო უმცირესობის დეპუტატი ოთარ კახიძე ქვეყანაში არსებულ კრიმინალურ ვითარებას აფასებს და აცხადებს, რომ კრიმინალის ზრდამ საგანგაშო მასშტაბი მიიღო. დეპუტატის ხელისუფლებას მოუწოდებს, გადადგან კონკრტული ნაბიჯები პრობლემის გადასაჭრელად.
"სამწუხაროდ, ის, რაც ეგზოტიკურ იშვიათობად ითვლებოდა, დღეს უკვე ყოველდღიური რუტინა გახდა. საზოგადოება უკვე მიეჩვია ყოველ დღე იმის მოსმენას, რომელი ბანკი დააყაჩაღეს, რომელი ბანკი გაძარცვეს, ვის გაეკიდნენ სროლა-სროლით, ვინ ჩაცხრილეს და კრიმინალის ზრდამ მიიღო უკვე ძალიან საგანგაშო მასშტაბი. მარტო ბოლო ერთი კვირის განმავლობაში რამდენიმე გახმაურებული ყაჩაღობა, სროლა, დაჭრა, მკვლელობა არის კრიმინალური ქრონიკა, რასაც ქართული ოცნების მთავრობა ტრადიციული უპასუხისმგებლობით უდგება. ისინი არ აღიარებენ პრობლემას. ამბობენ, რომ ყველაფერი კარგადაა. მათი პასუხი არის ის, რომ დანაშაულის სტატისტიკას მინისტრის გადაწყვეტილებით აღარ აქვეყნებენ. მათ სურთ, რომ საზოგადოებას ინფორმაცია არ მიაწოდონ რეალური მდგომარეობის შესახებ. მაგრამ, სამწუხაროდ, ჩვენი მოქალაქეები გრძნობენ დანაშაულის ზრდას და ეს არის ძალიან შემაშფოთებელი ტენდენცია. მინდა, მოვუწოდო ქართული ოცნების მთავრობას, აღიარონ პრობლემა და გადადგან კონკრეტული ნაბიჯები გაზრდილი კრიმინალის შესამცირებლად", - ამბობს დეპუტატი.
კახიძე კრიმინალის ზრდის ერთ-ერთ მიზეზად ქართული ოცნების მიერ წინასაარჩევნოდ დანაშაულებრივი სამყაროს გამოყენებას ასახელებს.
"ეს სურათი ჩვენ გვაქვს, მათ შორის, იმიტომ, რომ წინასაარჩევნოდ ქართულმა ოცნებამ გამოიყენა დანაშაულებრივი სამყარო და ახლა ცვენს საზოგადოებას უწვს ფასის გადახდა ამ უპასუხისმგებლო ნაბიჯის გამო. უდიდესი ძალისხმევა დაიხარჯა იმისთვის, რომ საქართველო ყოფილიყო უსაფრთხო ქვეყანა და ჩვენ წლების განმავლობაში ამ სერიოზულ მიღწევას ვფლანგავთ მავნებლური და უპასუხისმგებლო პოლიტიკის გამო, რომელსაც ივანიშვილის ხელისუფლება ახორციელებს", - თქვა კახიძემ.
