საქართველოს საავიაციო ბაზარს თურქული ავიაგადამზიდავი Turkish Airlines-ი აკონროლებს, რომელიც 2016 წლის მონაცემებით ბაზრის 16 %-ის მფლობელია. სამოქალაქო ავიაციის სააგენტოს მონაცემებით, 2016 წელს Turkish Airlines-ი საქართველოს აეროპორტებში 440 ათას 847 მგზავრს მოემსახურა. თუმცა უნდა აღინიშნოს, რომ Turkish Airlines-მა ბოლო ერთი წლის განმავლობაში ბაზრის 4 %-ი დაკარგა, რადგანაც 2015 წლის მონაცემებით ავიაკომპანია ბაზრის 20 %-ის მფლობელი იყო.

სამაგიეროდ, 2015 წლისგან განსხვავებით, რეგულარული რეისებით გადაყვანილი მგზავრების რაოდენობით, მეორე ადგილზეა Ukraine International Airlines-ი (flyuia). 2015 წელს კი მეორე პოზიციაზე Georgian Airways-ი იყო.

flyuia 2016 წელს საქართველოს აეროპორტებში მოემსახურა და დანიშნულების ადგილზე გადაიყვანა 271 ათას 53 მგზავრი, რაც საქართველოს აეროპორტებიდან გადაყვანილი მგზავრების 10 %-ია. 2015 წლის მონაცემებითაც, გადაყვანილი მგზავრების რიცხოვნობით, უკრაინული ავიაგადამზიდავი ბაზრის 10 %-ის მფლობელი იყო.

რაც შეეხება ქართულმა ავიაკომპანია Georgian Airways-ს, ის 2016 წელს 238 ათას 950 მგზავრს მოემსახურა.

სტატისტიკური ინფორმაციის მიხედვით, 2016 წელს რეგულარული რეისებით გადაყვანილი მგზავრების რიცხოვნობით, ბაზრის 6-6%-იანი წილის მფლობელები არიან: Aeroflot-ი, Flydubai, Wizz Air-ი და S 7.

2016 წლის მონაცემებით, ბაზრის 4%-იანი წილის მფლობელია თურქულ დაბალბიუჯეტიან ავიაკომპანია Pegasus Airlines-ი.

ბაზრის 3-3%-ი უკავიათ Lufthansa-ს, Air Arabia-ს, Yanair-ს და Belavia-ს.

2016 წელს მგზავრთგადაყვანებით, ბაზრის 2-2%-ის მფლობელები არიან: Air Astana, Qatar Airways-ი, Israir Airlines-ი, LOT-ი, Atlasglobal-ი, Ural Airlines-ი და AZAL-ი.

2016 წლის მაჩვენებლებით, რეგულარული და არარეგულარული რეისებით გადაყვანილი მგზავრთნაკადის მიხედვით, ბაზრის 91%-ი უცხოურ ავიაკომპანიებზე, ხოლო 9%-ი ეროვნულ ავიაგადამზიდავზე მოდის.

2015 წლის სტატისტიკური ინფორმაციის მიხედვით კი 88%-ი უცხოურ, ხოლო 12%-ი ადგილობრივ ავიაკომპანიებს ეკავა.

2016 წლის მონაცემებით ყველაზე მოთხოვნადი მიმართულებები თურქეთი, რუსეთი, უკრაინა, არაბთა გაერთიანებული საემიროები და ისრაელი იყო.

 შეგახსენებთ, 2016 წელს საქართველოს აეროპორტები 26%-ით მეტ მგზავრს მოემსახურა, ვიდრე 2015 წელს. სამოქალაქო ავიაციის სააგენტოს ინფორმაციით, 2016 წელს რეგულარული და არარეგულარული რეისებით, საქართველოს აეროპორტებმა სულ 2 მლნ 840 ათას 455 მგზავრი მიიღო, 2015 წელს კი - 2 მლნ 261 ათას 11 მგზავრი.

სტატისტიკური ინფორმაციით მიხედვით, 2016 წელს საქართველოს ყველა აეროპორტმა 25,63%-ით მეტი მგზავრი მიიღო ვიდრე 2015 წელს და 41,42%-ით მეტი მგზავრი ვიდრე 2014 წლის განმავლობაში.