„ორბი ჯგუფი“ ბათუმში მინი ქალაქის მშენებლობას იწყებს, რაშიც 200 მლნ ლარის ინვესტიციას განახორციელებს.
როგორც აჭარის ფინანსთა და ეკონომიკის მინისტრი რამაზ ბოლქვაძე განმარტავს, ბათუმში, ფიროსმანის ქუჩაზე, სპორტსკოლის მიმდებარედ 15 227 კვ/მ არასასოფლო-სამეურნეო დანიშნულების მიწის ნაკვეთზე მასშტაბური კომპლექსის მშენებლობა იწყება.
პროექტი სასტუმროების, რესტორნების, კაფეების, ღია სპორტული მოედნის, სპორტულ-გამაჯანსაღებელი და ბავშვთა გასართობი ცენტრის, საგამოფენო დარბაზის მშენებლობას გულისხმობს. ტერიტორიაზე მოეწყობა ასევე რეკარეაციული ზონა.
„პროექტი ბათუმში პირველი ქვეითადმოსიარულეთა ხიდის მშენებლობას ითვალისწინებს, რაც გარდა იმისა რომ მოძრაობას განტვირთავს, ასევე ქალაქის ზღვისპირა ნაწილს კიდევ უფრო გაალამაზებს.
ჩვენ მზად ვართ მხარი დავუჭიროთ რეგიონის განვითარებისთვის ღირებულ ნებისმიერ საინვესტიციო პროექტს. მინდა ვუსურვო წარმატება კომპანიას ამ ძალიან დიდი და მნიშვნელოვანი პროექტის განხორციელებისას», აცხადებს რამაზ ბოლქვაძე.
უკვე ცნობილია, რომ პროექტი 1000-ზე მეტი ახალი სამუშაო ადგილისა და 4500-ზე მეტი განთავსების ადგილი გაჩენას ითვალისწინებს.
ხელშეკრულების პირობების მიხედვით, ხიმშიაშვილის ქუჩაზე ქვეითად მოსიარულეთათვის გადასასვლელი ხიდი აშენდება, რაშიც 1 500 000 ლარის ინვესტიცია განხორციელდება. ასევე პროექტი 10 მეტრი სიგანის ახალი საავტომობილო გზის მოწყობას ითვალისწინებს, რომელიც გმირთა ხეივანს დავით ხახუტაიშვილის ქუჩასთან დააკავშირებს.
მოხდება ასევე საავტომობილო გზის გარე განათებით აღჭურვა. ტერიტორიაზე არსებულ ორ სპორტულ დარბაზში მოქმედი სპორტული სახეობების უწყვეტად ფუნქციონირების მიზნით კომპანია ალტერნატიულ შენობა-ნაგებობაში სპორტული სახეობების განთავსების ხარჯებს დაფარავს.
