შერიგებისა და სამოქალაქო თანასწორობის საკითხებში სახელმიწფო მინისტრ ქეთევან ციხელაშვილის განცხადებით, ვიზალიბერალიზაცია, აუცილებლად უნდა შევთავაზოთ აფხაზეთსა და ცხინვალის რეგიონებში მცხოვრებლებს. მისი თქმით, ხელისუფლების სამშვიდობო ხედვის ერთ-ერთი მნიშვნელოვანი ნაწილია, კიდევ უფრო ხელისაწვდომი გახდეს სახელმწიფოს მიერ მომსახურება და სერვისები ოკუპირებული ტერიტორიებზე მცხოვრებლებისთვის.
„ვიზალიბერალიზაცია - ეს მოსალოდნელი ძალიან ხელშესახები სარგებელი, რომელიც ტექნიკური პროცედურების დასრულების შემდგომ საქართველოს მოქალაქეებისთვის გახდება ხელისაწვდომი, აუცილებლად უნდა შევთავაზოთ ასევე აფხაზეთსა და ცხინვალის რეგიონებში მცხოვრებლებს. რა თქმა უნდა, ეს უკავშირდება გარკვეულ პროცედურებს. ჩვენ გვაქვს ხედვა, გეგმები, რომ ეს მაქსიმალურად მოქნილი და ხელმისაწვდომი გახდეს მათთვის. ვფიქრობ, ეს იქნება მნიშვნელოვანი შეღავათი იმ პირობებში მცხოვრებელთათვის, რომლებსაც, ფაქტობრივად, უწევს გამკლავება მავთულხლართებთან, რადგან მავთულხლართები გამოწვევაა არა მხოლოდ საქართველოს მიერ კონტროლირებად ტერიტორიაზე მცხოვრები ჩვენი მოსახლეობისთვის, არამედ უშუალოდ იმ რეგიონებში მცხოვრები მოსახლეობისთვის. აუცილებად გვინდა შევთავაზოთ ვიზალიბერალიზაციიდან გამომდინარე სარგებელი, ანუ თავისუფალი გადაადგილების შესაძლებლობა და არა მხოლოდ - ასევე ძალიან ბევრი სარგებელი, რომელიც ასოცირების შეთანხმებიდან გამომდინარეობს, უკავშირდება განათლებას, ჯანდაცვას, უკეთესი მომავლის პერსპექტივას. ეს ჩვენთვის ძალიან მნიშვნელოვანია“, - განაცხადა მინისტრმა.
