აჭარის რესპუბლიკურ ბიუჯეტში შევამცირეთ ადმინისტრაციული ხარჯები და მეტი ყურადღება კაპიტალურ და სოციალურ პროექტებს დავუთმეთ, აცხადებს აჭარის ფინანსთა და ეკონომიკის მინისტრი. რამაზ ბოლქვაძე ამბობს, რომ აჭარის 2017 წლის რესპუბლიკურ ბიუჯეტს სოციალური მიმართულება აქვს და ის მოსახლეობის საჭიროებებსაა მორგებული.
„ჩვენ რეგიონის მთავარი ფინანსური დოკუმენტი სწორედ მოსახლეობის საჭიროებას მოვარგეთ. მინდა ხაზგასმით აღვნიშნო, რომ აჭარის ა.რ რესპუბლიკურ ბიუჯეტში შევამცირეთ ადმინისტრაციული ხარჯები და მეტი ყურადღება კაპიტალურ და სოციალურ პროექტებს დავუთმეთ. ჯანდაცვის პროგრამები 505,0 ათასი ლარით გაიზარდა, გაზრდილია გზების რეაბილიტაციის პროგრამები 7 384,0 ათასი ლარით, ტურიზმი 1 618,3 ათასი ლარით, სოფელი 4 570,3 ათასი ლარით, განათლება 3 877,4 ათასი ლარით.
უპრეცედენტოდ მაღალი თანხაა 2017 წელს მუნიციპალიტეტების კაპიტალური ტრანსფერები, რაც 71 208,8 ათას ლარს შეადგენს. ჩვენ ვმუშაობთ და ვგეგმავთ, რომ მომდევნო წელს კიდევ უფრო მეტი თანხა განვსაზღვროთ ბიუჯეტში კაპიტალური პროექტების დასაფინანსებლად“, აცხადებს აჭარის მინისტრთა კაბინეტის ნომერ პირველი ფინანსისტი.
