აჭარაში კერძო სექტორის მიერ განხორციელებული ინვესტიციების მოცულობა 23%-ით გაიზარდა. აჭარის ფინანსთა და ეკონომიკის მინისტრის რამაზ ბოლქვაძის განმარტებით,  2016 წლის 9 თვის განმავლობაში რეგიონში კერძო სექტორის მიერ განხორციელებულმა ინვესტიციებმა 320.2 მილიონი აშშ დოლარის შეადგინა.

„იანვარ-სექტემბერში აჭარის ავტონომიური რესპუბლიკის ტერიტორიაზე კერძო სექტორის მიერ განხორციელდა 320.2 მილიონი აშშ დოლარის ოდენობის  ინვესტიცია, საიდანაც 235.7 მილიონი აშშ დოლარი იყო უცხოური, ხოლო 84.5 მილიონი აშშ დოლარი ადგილობრივი   ინვესტიცია.

2016 წლის 9 თვის განმავლობაში აჭარაში კერძო სექტორის მიერ განხორციელებული   ინვესტიციები წინა წლის ანალოგიურ მაჩვენებელთან შედარებით გაზრდილია 23%-ით“, აცხადებს აჭარის მინისტრთა კაბინეტის მთავარი ფინანსისტი.

მინისტრი განმარტავს, რომ მიმდინარე ეტაპისათვის რეგიონში ყველაზე მეტი ინვესტიცია ენერგეტიკის დარგშია განხორციელებული.

სტატისტიკური ინფორმაციის მიხედვით, აჭარის ავტონომიური რესპუბლიკის ტერიტორიაზე კერძო სექტორის მიერ  განხორციელებული ინვესტიციები ეკონომიკური სექტორების მიხედვით შემდეგნაირად გადანაწილდა: ენერგეტიკა (47.5%), ტურიზმი (31.4%),  მშენებლობა (18.8%).

აღსანიშნავია, რომ საანგარიშო პერიოდში უცხოური ინვესტიციების უმეტესი ნაწილი განხორციელდა ენერგეტიკის (64.4%),  ტურიზმისა (33.3%) და მშენებლობის (1.9%) სექტორებში.

2016 წლის 9 თვის მონაცემებით ყველაზე მსხვილი ინვესტორი ქვეყნებია: ნორვეგია და ინდოეთი (49.4%) და თურქეთი (44.0%).