აჭარის საინვესტიციო პორტფელი საკმაოდ მოცულობითია და მილიარდ 157 200 000 აშშ დოლარს შეადგენს.
აჭარის ფინანსთა და ეკონომიკის მინისტრის რამაზ ბოლქვაძის განმარტებით, 2017 წელს მხოლოდ აჭარის ფინანსთა და ეკონომიკის სამინისტროსთან უკვე გაფორმებული ხელშეკრულებების ფარგლებში არანაკლებ 161 177 050 ლარის ინვესტიცია განხორციელდება.
„ამავე ხელშეკრულებების ფარგლებში 2020 წლამდე დამატებით არანაკლებ თითქმის მილიარდი ლარის ინვესტიცია განხორციელდება, რაც საკმაოდ მაღალი მაჩვენებელია.
მხოლოდ ახალ ბულვარში ამ ეტაპზე 640 მლნ ლარის ღირებულების საინვესტიციო პროექტები მიმდინარეობს. გმირთა ხეივნის ტერიტორიაზე კი დაახლოებით 173 მლნ ლარის ღირებულების პროექტი ხორციელდება. იმისათვის რომ ინვესტირების პროცესი კიდევ უფრო ეფექტური გახდეს ახალი საინვესტიციო ტერიტორიების ათვისებას ვიწყებთ. მომდევნო წლიდან უკვე გათვალისწინებულია თანხები და ჩაქვი-ციხისძირისა და ბობოყვათის საკურორტო-სარეკრეაციო ადგილების განაშენიანების რეგულირების გეგმა შეიქმნება, რაც აღნიშნული ადგილების მიმართ საინვესტიციო ინტერესს გაზრდის და სამომავლოდ ახალ პროექტების განხორციელება დაიწყება», აცხადებს რამაზ ბოლქვაძე.
მინისტრის თქმით, კიდევ ერთი უმნიშვნელოვანესი საინვესტიციო ტერიტორია გონიოა.
„გონიოს განვითარების კონცეფციის მიხედვით, რომელზეც ჩვენ ძალიან ცნობილ საერთაშორისო ორგანიზაცია „ქოლიერსთან“ ერთად ვმუშაობთ, ეს იქნება ფაქტიურად „ქალაქი ქალაქში“- ახალი პროექტები, ახალი სამუშაო ადგილები, განვითარებული ინფრასტრუქტურა - გეგმები საკმაოდ ამბიციურია და მინდა გითხრათ, რომ ინვესტორთა დაინტერესებაც საკმაოდ მაღალია. მოლაპარაკებები აქტიურად მიმდინარეობს და გონიოს სახით მალე კიდევ ერთ განვითარებულ ტერიტორიას მივიღებთ აჭარაში. ჩვენ ვგეგმავთ, რომ 2017 წლის აჭარის ა.რ რესპუბლიკური ბიუჯეტი 315 მლნ ლარზე მეტი იქნება, რაც ნიშნავს რომ მომავალ წელს ფინანსური დოკუმენტი კიდევ 35,8%-ით გაიზარდა. რაც შეეხება წარმოების პროცესს აჭარაში - მხოლოდ ხელვაჩაურში დაახლოებით 100 საწარმო ფუნქციონირებს. „აწარმოე საქართველოში“ პროგრამის ფარგლებში აჭარაში 11 საწარმო უკვე გაიხსნა და დამატებით 4 საწარმო გაიხსნება. მხოლოდ 11 საწარმოს ინვესტიცია ჯამში 29 634 000 ლარს შეადგენს და ჯამში 300 ზე მეტი მოქალაქე დასაქმდება“- განაცხადა რამაზ ბოლქვაძემ.
