,,პატრიოტთა ალიანისი“ პარლამენტის სხდომების ბოიკოტირებას გაგმავს. ვიცე-სპიკერის ირმა ინაშვილის განცხადებით, მის ფრაქციას ადგილის დაკავება ეუთო-სა და ევროსაბჭოს საპარლამენტო დელეგაციებში სურს.
„ჩვენი მოთხოვნები გათვალისწინებული არ არის. გამეხარდება, თუ უმრავლესობა ჩვენს მოთხოვნას გაითვალისწინებს და პროტესტის არანაირი ფორმის მიღება აღარ გახდება საჭირო. პროტესტის ეს ფორმა - სხდომებზე არდასწრება, ბოიკოტირება, ესეც პოლიტიკის და პოლიტიკური პროცესის ნაწილია. სხვა რა ზომას უნდა მიმართოს დეპუტატმა, როცა რაღაც აქვს გასაპროტესტებელი?“, - განაცხადა ინაშვილმა.
საპარლამენტო უმრავლესობაში განმარტავენ, რომ გადაწყვეტილება კანონის შესაბამისად მიიღეს.
„ჩვენ მოქმედებთ კანონის სრული დაცვით. გარკვეული დამატებითი ნაბიჯების გადადგმას ითხოვს ჩვენგან პატრიოტთა ალიანსი. პატრიოტთა ალიანსს იმ კვოტის ფარგლებში, რაც არის დადგენილი რეგლამენტით და გამომდინარეობს კანონიდან, ეკუთვნის ოთხი ადგილი. პირველ ეტაპზე, მათ თანხმობა განაცხადეს, თუმცა მოგვიანებით შეცვალეს პოზიცია. ჩვენ ვეცდებით, რომ მაქსიმალურად გავითვალისწინოთ ოპოზიციის მოსაზრებები“, - განაცხადა თამარ ჩუგოშვილმა.
