ევროპის რეკონსტრუქციისა და განვითარების ბანკის (EBRD) დირექტორთა საბჭომ საქართველოსთვის ახალი სტრატეგიული გეგმა დაამტკიცა.
როგორც ბანკის მიერ გავრცელებულ ინფორმაციაშია აღნიშნული, გეგმა კიდევ ერთხელ ადასტურებს ბანკის მიერ ნაკისრ ვალდებულებას მხარი დაუჭიროს ქვეყნის ეკონომიკის განვითარებას და განსაზღვრავს საქართველოში მოღვაწეობის პრიორიტეტებს შემდგომი ოთხი წლისთვის;
„სტრატეგიის ახალი დოკუმენტი ასახავს ქვეყნის იმ პრიორიტეტებს, რომლებიც ახლახანს განსაზღვრა საქართველოს მთავრობამ. დოკუმენტი მომზადდა ისეთი მხარეების სრული ჩართულობით, როგორებიცაა მთავრობა, კერძო სექტორი, საერთაშორისო ფინანსური ინსტიტუტები და დონორი ორგანიზაციები და მიიღო ბანკის აქციონერების, კერძოდ კი ევროპის კავშირის ძლიერი მხარდაჭერა», აცხადებენ ბანკის EBRD-ში.
სტრატეგიულ გეგმაში გაწერილია შემდეგი პრიორიტეტები:
- ევრობანკი გააგრძელებს კერძო სექტორის განვითარებისა და კონკურენტუნარიანობის მხარდაჭერას ინოვაციის, გაზრდილი დამატებითი ღირებულების და ევროკავშირის ღრმა და ყოვლისმომცველი თავისუფალი ვაჭრობის შესახებ შეთანხმების სტანდარტებსა და მოვალეობებთან შესაბამისობის გზით; ევრობანკი განაგრძობს მცირე და საშუალო ბიზნესისა და კერძო სექტორის მხარდაჭერას კარგად განვითარებული ადგილობრივი საბანკო სექტორის მეშვეობით, განსაკუთრებული აქცენტით ისეთ მაღალი პოტენციალის მქონე მიმართულებებზე, როგორებიცაა სოფლის მეურნეობა, მასპინძლობის სექტორი და ინოვაცია; ბანკი გეგმავს ფინანსური მხარდაჭერის კონცენტრაციას მუშახელის სწავლების უნარებში, გამოკვეთილი აქცენტით რეგიონალური ჩართულობის, ახალგაზრდობისა და გენდერულ საკითხებზე.
- ფინანსური სექტორის კუთხით, ევრობანკის პრიორიტეტი იქნება ფინანსური შუამავლობის გაღრმავება და ადგილობრივი სავალუტო და სასესხო კაპიტალის ბაზრების განვითარება, რათა კერძო სექტორს ჰქონდეს ფინანსებზე წვდომის უკეთესი შესაძლებლობა;
- ბანკის კიდევ ერთი პრიორიტეტი იქნება ბაზრების გაფართოება რეგიონთაშორისი კავშირის გზით, საქართველოს, როგორც რეგიონალური დამაკავშირებელი რგოლის, პოტენციალის გაზრდა - ქვეყნის ინფრასტუქტურის შემდგომი მოდერნიზაციის საშუალებით. ევრობანკი განიხილავს ისეთ ინვესტიციებს საჯარო და კერძო სექტორს შორის პარტნიორობის პროგრამის ფარგლებში, რომლებიც საშუალებას მისცემს საქართველოს ისარგებლოს თავისი გეოგრაფიული მდებარეობის უპირატესობით სამხრეთ კავკასიას, ცენტრალურ აზიასა და ევროპას შორის.
- გარდა ამისა, ახალი სტრატეგიული გეგმა გულისხმობს გაძლიერებულ აქცენტს განახლებადი ენერგიის, რესურსების ეფექტურობისა და კლიმატურ ცვლილებთან ადაპტაციის თემების წინ წამოწევაზე, რათა გაუმჯობესდეს, ამ კუთხით, ქვეყნის ეკონომიკის კონკურენტუნარიანობა და მდგრადობა; ევრობანკი გააგრძელებს განახლებადი ენერგიის მწარმოებლურობისა მხარდაჭერას ჰიდროელექტროობაში ისევე, როგორც გადამცემი ხაზების შენებას რეგიონალური ბაზრების დასაკავშირებლად; სპეციალური ენერგოეფექტურობის სამოქმედო გეგმა იმუშავებს ენერგიის გადაჭარბებული ხარჯვის პრობლემის დაძლევაზე;
საქართველოში თავისი მოღვაწეობის დაწყების დღიდან, ევრობანკმა გამოყო 3 მილიარ ევრომდე დაახლოებით 200 პროექტის დასაფინანსებლად ფინანსურ, კორპორატიურ, ინფრასტრუქტურულ თუ ენერგო სექტორებში. ბანკის ინვესტიციის 91 პროცენტი კერძო სექტორში განხორციელდა; ბანკის არსებული ფორტფელის 40 პროცენტი ენერგოსექტორშია, რასაც მოსდევს ფინანსური სექტორი 27 პროცენტით; მრეწველობა და კომერცია იკავებს 26 პროცენტს, ინფრასტრუქტირა კი - 6 პროცენტს.
