„კორპორაცია ფოთის საზღვაო ნავსადგურის“ წინააღმდეგ კონკურენციის სააგენტოში შესული საჩივარის მოკვლევის ვადა გახანგრძლივდა. სააგენტოს ინფორმაციით, მიმდინარე წლის ივნისის თვეში, კონკურენციის სააგენტოში, სატერმინალო მომსახურებით დაკავებული კომპანიებიდან, ერთობლივი საჩივარი შემოვიდა ფოთის საზღვაო ნავსადგურის წინააღმდეგ. რის საფუძველზეც, კანონმდებლობით დადგენილი პროცედურების შესაბამისად, ,,კონკურენციის შესახებ“ საქართველოს კანონის მე-6 მუხლის სავარაუდო დარღვევის თაობაზე მოკვლევა დაიწყო.
პარალელურად, საჩივრის საფუძველზე, სააგენტომ საქალაქო სასამართლოს, ფოთის საზღვაო ნავსადგურის 1 ივლისიდან ასამოქმედებელი ბრძანების შეჩერების თაობაზე მიმართა, რაც დაკმაყოფილდა და ზემოაღნიშნული ბრძანების ამოქმედება მოკვლევის დასრულებამდე შეჩერდა.
მოდავე მხარეებისა და ყველა დაინტერესებული სუბიექტის ჩართულობით, დღეის მონაცემებით, სააგენტოში საკითხთან დაკავშირებული მოცულობითი დოკუმენტაციის შესწავლის პროცესი გრძელდება, რაც დამატებით დროს საჭიროებს. შესაბამისად, დაწყებული საქმის მოკვლევის ვადა 2017 წლის 30 მარტამდე გახანგრძლივდა.
