ევროკავშირის თავმჯდომარე ქვეყნის, სლოვაკეთის საგარეო საქმეთა მინისტრი მიროსლავ ლაიჩაკი საქართველოსთვის სავიზო რეჟიმის გაუქმების გზაზე დაბრკოლებებს ვერ ხედავს.
ამის შესახებ მიროსლავ ლაიჩაკმა ევროკავშირის საგარეო საქმეთა მინისტრების შეხვედრის დაწყებამდე ჟურნალისტებს განუცხადა.
მისი თქმით, საქართველოს ვიზალიბერალიზაციის საკითხზე ტრიალოგი 13 დეკემბერს გაიმართება, 20 დეკემბერს კი აღნიშნულ საკითხს ევროკავშირის მუდმივ წარმომადგენელთა კომიტეტი (COREPER) განიხილავს.
„მოხარული ვარ შეჩერების მექანიზმთან დაკავშირებით შეთანხმების მიღწევის გამო. ხვალ გვაქვს ტრიალოგის ფარგლებში შეხვედრა ევროპარლამენტთან და ეს საკითხის დღის წესრიგში 20 დეკემბერის შეხვედრაზეც იქნება. ჩვენ დაბრკოლებებს ვერ ვხედავთ, ქართველი ხალხი უვიზო რეჟიმს ძალიან მალე მიიღებს”, - განაცხადა სლოვაკეთის საგარეო საქმეთა მინისტრმა.
მინისტრის თქმით, საქართველოს ვიზალიბერალიზაციის საკითხზე უკვე ყველაფერი შეთანხმებულია, ღია კითხვები აღარ არსებობს.
კითხვაზე- მოესწრება თუ არა პროცესის დასრულება წლის ბოლომდე, ლაიჩაკმა უპასუხა, რომ ამ შეკითხვაზე პასუხის გაცემა რთულია, რადგან არსებობს პროცედურები.
