საქართველოს პრემიერ-მინისტრი ყველას მოუწოდებს, საბანკო სექტორის მიმართ დაუსაბუთებელი ბრალდებებისგან თავი შეიკავონ. გიორგი კვირიკაშვილმა მთავრობის სხდომაზე განაცხადა, რომ მთავრობის 4-პუნქტიანი სამოქმედო გეგმის განსახორცილებლად, უმნიშვნელოვანესი როლი საბანკო სექტორს ენიჭება
,,ქართული საბანკო სექტორი არის ერთ-ერთი ყველაზე განვითარებული ჩვენ რეგიონში და არ მხოლოდ. ჩვენ გვაქვს ძალიან მნიშვნელოვანი განვითარებული ფინანსური ინსტიტუტები და მათი ჩართულობა ამ რეფორმების პროცესში არის უმნიშვნელოვანესი.
ის წარმოადგენს ძალიან მნიშვნელოვან რგოლს ჩვენი ეკონომიკის განვითარების და ნებისმიერი უარყოფითი, მითუმეტეს აბსოლუტურად დაუსაბუთებელი ბრალდება ამ მიმართულებით იწვევს ძალიან მნიშვნელოვან უარყოფით შედეგებს. ამიტომ ყველას მოვუწოდებ, განსაკუთრებით მათ, ვისაც ჩვენ ხშირად ვხედავთ ტელეეთერებში, რომ მეტი სიფრთხილე გამოიჩინონ, როდესაც საუბარია კრიტიკაზე. არავისთვის არ არის უცხო კრიტიკა, მითუმეტეს არც მთავრობისთვის, მაგრამ როდესაც საქმე საფინანსო ინსტიტუტს ეხება, ეს არ შეიძლება საჯარო იყოს მანამ, სანამ ყველა არგუმენტი არ იქნება განხილული იმ ფორმატებში, რომელიც აგვარიდებს ამ მგრძნობიარე ინსტიტუციებისადმი ასეთი ტიპის ბრალდებებს.
ფინანსთა მინისტრმა განაცხადა და მეც ვიმეორებ, რომ ჩვენ გაგვაჩნია სრული ნდობა, ვართ ძალიან მჭიდრო კოორდინაციაში.საბანკო სექტორის და მთლაინად ბიზნესის და კერძო სექტორის მონაწილეობა ამ ძალიან მნიშვნელოვანი რეფორმირების პროცესში არის კრიტიკულად მნიშვნელოვანი. ამიტომ, ჩვენ ძალიან ვაფასებთ ამას“, - განაცხადა კვირიკაშვილმა.
