ლატვიის რესპუბლიკის საგანგებო და სრულუფლებიანი ელჩი საქართველოში იანის ზლამეცი საქართველოს, ევროკავშირის საბჭოსა და ევროპარლამენტს შორის, შეჩერების მექანიზმზე მიღწეულ შეთანხმებას ულოცავს.
ამის შესახებ დიპლომატმა პრემიერ-მინისტრ გიორგი კვირიკაშვილთან შეხვედრისას განაცხადა.
ლატვიის ელჩის შეფასებით, ე.წ. შეჩერების მექანიზმთან დაკავშირებით მიღწეული პროგრესი, საქართველოს მოქალაქეებისთვის უვიზო მიმოსვლის რეჟიმის შემოღების თვალსაზრისით, მნიშვნელოვანია.
ამასთან, იანის ზლამეცმა გიორგი კვირიკაშვილს საპარლამენტო არჩევნებში დამაჯერებელი გამარჯვება და პრემიერ-მინისტრად ხელახლა არჩევაც მიულოცა და წარმატებული საქმიანობა უსურვა.
შეხვედრაზე საუბარი ორმხრივი თანამშრომლობის შემდგომ გაღრმავებას და საქართველოს ევროპული და ევროატლანტიკური ინტეგრაციის საკითხებსაც შეეხო.
როგორც პრემიერ-მინისტრმა აღნიშნა, საქართველოს მთავრობა ქვეყნის ევროპული და ევროატლანტიკური ინტეგრაციის გზაზე ლატვიის რესპუბლიკის მხარდაჭერას აფასებს.
ამასთან, შეხვედრაზე ყურადღება სავაჭრო-ეკონომიკური ურთიერთობების განვითარების პერსპექტივასაც დაეთმო. ხაზი გაესვა ამ მიმართულებით არსებულ პოზიტიურ დინამიკას.
აღინიშნა, რომ ეკონომიკური ურთიერთობების განვითარებაში მნიშვნელოვან როლს ასრულებს მთავრობათაშორისი ეკონომიკური კომისია, რომლის მორიგი სხდომის გამართვა, თბილისში, მომავალ წელს იგეგმება.
