თბილისში აკრედიტებული ელჩები ამბობენ, რომ პოლიტიკურად თქვენი წონა ნულის ტოლია, - მიმართა ,,ნაციონალური მოძრაობის“ დეპუტატმა გიორგი კანდელაკმა პრემიერ-მინისტრობის კანდიდატ გიორგი კვირიკაშვილს.
”არ გაინტერესებთ პირადად თქვენზე რას ფიქრობენ საერთაშორისო ორგანიზაციები?! პარტნიორები?! თბილისში აკრედიტებული ელჩები რას ამბობენ?! ისინი პირადად ჩვენთან საუბარში ამბობენ, რომ სასიამოვნო მოსაუბრე ხართ, მაგრამ დამოუკიდებლად ვერაფერს წყვეტთ და პოლიტიკურად თქვენი წონა ნულის ტოლია და მნიშვნელოვანი გადაწყვეტილებების მისაღებად ისინი მიდიან ბიძინა ივანიშვილთან. მაინტერესებს ამის არ გრცხვენიათ? თქვენ პიროვნებას არ ვეხები, არ მეამაყება, რომ ასეთი დამოკიდებულება არსებობს, საერთაშორისო პარტნიორების მხრიდან”, - მიმართა კანდელაკმა კვირიკაშვილს.
კვირიკაშვილის განცხადებით, ის არ დაიწყებს ინსინუაციებს იმის შესახებ, თუ რომელი პოლიტიკური ძალის წონაა ნულის ტოლი.
"რაც შეეხება გიორგი კანდელაკის კომენტარებს პოლიტიკურ წონასთან და კილოგრამებთან დაკავშირებით - ეს თქვენი სუბიექტური შეფასებაა. საერთოდ, ეს არის იმ კამპანიის გაგრძელება, რომელსაც ჩვენ ვისმენთ. თქვენ არ გინდათ აღიაროთ, რომ არჩევნები წააგეთ, და წააგეთ არჩევნები იმ პოლიტიკურ გუნდთან, რომელსაც პირადად მე ვხელმძღვანელობ. ეს არის მთელი უბედურება და ეს არის ამ კამპანიის ნაწილი”,- აღნიშნა კვირიკაშვილმა.
მისივე თქმით, რა თქმა უნდა, ბიძინა ივანიშვილს აქვს უდიდესი დამსახურება, ის არის „ქართული ოცნების“ დამფუძნებელი.
