პრემიერ-მინისტრობის კანდიდატთან შეხვედრისას საპარლამენტო უმცირესობის წევრები „ქართული ოცნებისა“ და „პატრიოტთა ალიანსის“ თანამშრომლობის პერსპექტივით დაინტერესდნენ. გიორგი კვირიკაშვილის შეფასებით, ,,ნაციონალური მოძრაობა“ მხოლოდ დეკლარირებულად არის პროდასავლური, ,,პატრიოტთა ალიანსი“ კი ღიად ეწინააღმდეგება ქვეყნის დასავლურ კურსს.
„რა თქმა უნდა, ჩვენ არაერთხელ მოგვისმენია „პატრიოტთა ალიანსიდან“ განცხადებები, რომლებიც, პირდაპირ ეწინააღმდეგება ქვეყნის დასვალურ ინტეგრაციას. სტრატეგიულ ურთიერთობაში ჩვენ ვერ შევალთ. ჩემგან ეს კრიტიკა არაერთხელ ყოფილა, მაგრამ თქვენგან მიკვირს ამის პრეტენზიები, იმ პოლიტიკური ძალისგან, რომელიც მხოლოდ დეკლარირებულად არის პროდასავლური. ყველაფერი ის, რაც თქვენი ხელისგან შეიქმნა ამ ქვეყანაში - მედიათავისუფლების აბსოლუტურად დრამატული სურათი, ადამიანის უფლებების კუთხით კატასტროფული სურათი, ქონების მართვის მაჩვენებლები, რომლითაც აბსოლუტურად ფსკერზე იყო ქვეყანა - თქვენი მხრიდან პრეტენზიები ჩვენთან მიმართებაში, რომ ჩვენ თურმე სუსტ ნაბიჯებს ვდგამთ დასავლეთთან მიმართებაში, არის ძალიან გასაკვირი, რბილად რომ ვთქვათ. თქვენ საქმით აკეთებდით აბსოლუტურად ანტიდასავლურ საქმეს და ჩვენგან და საქართველოს მოსახლეობისგან იმსახურებთ ძალიან დამსახურებულ კრიტიკას ამ მიმართულებით, ამიტომ ვერ მივიღებ ამ კრიტიკას“, - მიმართა კვირიკაშილმა საპარლამენტო უმცირესობის წევრებს.
პრემიერ-მინისტრის მოვალეობის შემსრულებელმა გიგა ოთხოზორიას მკვლელობის საქმის გამოძიებასთან დაკავშირებით დასმულ კითხვასაც უპასუხა. მისი თქმით, ინციდენტების პრევენციისა და მათზე რეაგირების მექანიზმის ფარგლებში გამართული შეხვედრებისას, ასევე, საერთაშორისო ორგანიზაციებთან საუბრისას და აბაშიძე-კარასინის ფორმატში, აღნიშნული საკითხი ძალიან მწვავედ დაისვა.
