მინდა, სრული პასუხისმგებლობით ვთქვა, რომ ყველა სიტყვა, რომელიც მე ვთქვი, პირველ რიგში ეხებოდა აფხაზეთს, ეხებოდა ცხინვალის რეგიონს და სამაჩაბლოს, - ამის შესახებ საქართველოს პრემიერ-მინისტრობის მოვალეობის შემსრულებელმა გიორგი კვირიკაშვილმა პარლამენტში ფრაქცია „პატრიოტთა ალიანსთან“ შეხვედრაზე განაცხადა.
როგორც გიორგი კვირიკაშვილმა აღნიშნა, საქართველოს უმთავრესი გამოწვევა დღეს არის ეკონომიკა.
„ყველაზე მთავარი გამოწვევა გახლავთ სამუშაო ადგილების შექმნა და ჩვენი ქვეყნის მოსახლეობისთვის სიღარიბის დაძლევა გახლავთ უპირველესი ამოცანა. მინდა, სრული პასუხისმგებლობით ვთქვა, რომ ყველა სიტყვა, რომელიც მე ვთქვი, ეხებოდა აფხაზეთს, ეხებოდა ცხინვალის რეგიონს და სამაჩაბლოს. ამას სრული პასუხისმგებლობით ვაცხადებ. გათავისებული მაქვს პასუხისმგებლობა, რომელიც მე პირადად და ამ კაბინეტს ეკისრება, ამ მიმართულებით მნიშვნელოვანი ძვრების განხორციელების კუთხით“, - განაცხადა გიორგი კვირიკაშვილმა.
მისი თქმით, საქართველოს დღეს აქვს ერთადერთი ბერკეტი, რომელიც მაქსიმალურად უნდა გამოიყენოს, ეს არის ეკონომიკური განვითარების ბერკეტი.
„ჩვენი ქვეყანა უნდა ვაქციოთ მიმზიდველ ქვეყანად და უნდა ვეცადოთ დავათბოთ ურთიერთობა. ამ ურთიერთობის დათბობას დასჭირდება საკანონმდებლო ცვლილება, თუ დასჭირდება უფრო მეტი დაახლოება ადამიანებს შორის, ყველაფრისთვის უნდა ვიყოთ მზად. ერთადერთი, რასაც ჩვენ ვერ გავაკეთებთ ვერანაირი კომპრომისი ვერ იქნება, ტერიტორიული მთლიანობის და სუვერენიტეტის კუთხით. დანარჩენი ყველაფრისთვის მზად ვართ. ჩვენ გვაქვს არაერთი საინტერესო წინადადება. მე ვარჩიე, რომ მესაუბრა ეკონომიკურ განვითარებაზე მეტი, სხვათა შორის ყურადღება დავუთმე ადამიანის უფლებებს და ინსტიტუციურ განვითარებასაც, თუმცა ეს ფორმატი არ ითვალისწინებს იმ დეტალებზე საუბარს, რომელზეც ჩვენ ძალიან ბევრს ვმუშაობთ“, - განაცხადა გიორგი კვირიკაშვილმა.
პრემიერ-მინისტრობის კანდიდატმა „პატრიოტთა ალიანსის“ წევრებს სამუშაო ფორმატში მუშაობა შესთავაზა და აღნიშნა, რომ მათთან ერთად იმსჯელებდა უამრავ წინადადებაზე, რომელსაც დღეს ქეთი ციხელაშვილის უწყება ამზადებს.
„ჩვენ გვაქვს არაერთი ძალიან საინტერესო ინიციატივა, რათა აღვადგინოთ ნდობა აფხაზებსა და ქართველებს და ოსებსაც და ქართველებს შორის. გადავგდათ მნიშვნელოვანი ნაბიჯები ქვეყნის გამთლიანებისკენ და არა მხოლოდ ტერიტორიების დაბრუნებისკენ. ეს არის ჩვენი მთავარი ამოცანა. მინდა, კიდევ ერთხელ გითხრათ, რომ მთელი ჩვენი გეგმა ამისკენაა მიმართული. ყველა წინადადებაში იგულისხმება აფხაზეთი და სამაჩაბლო. რაც ყველაზე მთავარია, ჩვენ ვერ შევეგუებით იმ ნაბიჯებს, რასაც დღეს რუსეთი დგამს ამ ტერიტორიებთან მიმართებაში. კერძოდ, მხედველობაში მაქვს ის ბოლო პერიოდის ხელშეკრულებები, რომელიც გაფორმდა. სამწუხაროდ გარდა ჩვენი დიპლომატიური ნაბიჯებისა და ეკონომიკური განვითარების გეგმისა, სხვა შეიარაღება ჩვენ არ გვაქვს. არც უნდა ვიხაროთ არასოდეს აღარ უნდა გავივლოთ გულში ის, რომ რამენაირად სამხედრო ფორმებს მივმართოთ“, - აღნიშნა კვირიკაშვილმა.
მისივე თქმით, მაქსიმალურად მშვიდობიანი გზით უნდა მოხდეს ნდობის აღდგენა და გაკეთდეს თამამი ინიციატივები.
„არ ვაპირებ იმ რუტინის გაგრძელებას, რომელშიც აქამდე ვიმყოფებოდით, ეს არის ჩემი გზავნილი“, - განაცხადა კვირიკაშვილმა.
