წარმოდგენილ შემადგენლობაში არიან ის მინისტრები, რომელთა საქმიანობას კარგად ვიცნობთ. ბევრი მათგანი ჩვენი თანამებრძოლი იყო ბოლო 10-12 წლის განმავლობაში, მათთან ერთად ვუპირისპირდებოდით იმ ძალადობრივ რეჟიმს, რომელიც დაამყარა წინა მმართველობამ,- განაცხადა პარლამენტში „პატრიოტთა ალიანსის“ ფრაქციის სხდომაზე ვიცე-სპიკერმა ირმა ინაშვილმა.
მისი თქმით, რამდენიმე მინისტრობის კანდიდატს ფრაქცია მხარს დაუჭერს. როგორც ინაშვილმა აღნიშნა, ისინი ძალიან კომპეტენტურები არიან და მათ საქმიანობას პოზოტიურად აფასებს.
„ამ კანდიდატთა შორის არიან ქალბატონი თეა წულუკიანი, ბატონი კახი კახიშვილი, ვიქტორ დოლიძე, სოზარ სუბარი. ჩვენ ძალიან ბევრი მოვლენა ერთად გავიარეთ, ასე რომ ჩვენ დავსვამთ კონკრეტულ და მწვავე შეკითხვებს სხვა მინისტრებთან მიმართებაში, მაგრამ ჩემი მხრიდან მინდა დავაფიქსირო კონკრეტული მინისტრებისადმი მხარდაჭერა. ვფიქრობ, ძალიან კომპეტენტური კანდიდატი გვყავს თეა წულუკიანის სახით, ძალიან კარგად და კომპტეენტურად უძღვება ქალბატონი თეა იუსტიციის სამინისტროს საქმიანობას და იმ ურთულეს რეფორმებს, რომელიც ამ სფეროში ვითარდება. ძალიან პოზიტიურად ვაფასებთ კახიშვილის საქმიანობას იმ პოსტზე, სადაც იყო. მიდის სისტემის ჰუმანიზაციის პროცესი, არაერთი ნოვატორული იდეა და პროექტი ხორციელდება, რასაც მე უაღერესად ვაფასებ“,- განაცხადა ინაშვილმა.
გამორჩეულ კანდიდატებს შორის მოხვდა ჯანდაცვის მინისტრობის კანდიდატიც. ინაშვილის განცხადებით, მიუხედავად იმისა, რომ დავით სერგეენკოსთან პატარა შეკამათება მოუვიდა საგარეჯოს არჩევნების მიმდინარეობისას, მას დიდ მადლობას უხდის ცე -ჰეპატიტის პროგრამის განხორციელებისათვის.
