4 ნოემბერს, „ტექნოპარკში“ ამერიკის შეერთებული შტატების საერთაშორისო განვითარების სააგენტოს (USAID) მიერ დაფინანსებული პროქტის, “მმართველობა განვითარებისთვის” (G4G) და ფინანსთა სამინისტროს თანამშრომლობით, "ბუღალტრული აღრიცხვის, ანგარიშგებისა და აუდიტის შესახებ" ახალი კანონისა და მოგების გადასახადის რეფორმის საჯარო განხილვა გაიმართა.
ღონისძიების მონაწილეებს მისასალმებელი სიტყვით მიმართეს ფინანსთა მინისტრის მოადგილემ, ლაშა ხუციშვილმა, საერთაშორისო აუდიტორული კომპანია „Deloitte and Touche“-ის მმართველმა პარტნიორმა, ჯონ რობინსონმა და G4G-ს პროექტის ხელმძღვანელმა, ნატალია ბერუაშვილმა. ფინანსთა მინისტრის მოადგილემ, ასევე, უხელმძღვანელა მოგების გადასახადის რეფორმასთან დაკავშირებით გამართულ დისკუსიას.
განხილვაში მონაწილეობა მიიღეს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის უფროსმა, იური დოლიძემ და კომპანია „Deloitte and Touche“-ის აუდიტის დეპარტამენტის დირექტორმა, თამარ ნაცვლიშვილმა.
G4G USAID-ის $19.3 მილიონიანი პროექტია, რომელიც „დელოიტ ქონსალთინგის” მიერ ხორციელდება. პროექტი მიზნად ისახავს, საკანონმდებლო და მარეგულირებელი რეფორმების სამართლიანად და გამჭვირვალედ დაგეგმვის და განხორციელების მხარდაჭერით, საქართველოს მთავრობის დახმარებას ბიზნესის ხელშემწყობი გარემოს გასაუმჯობესებლად.
