მეცხრე მოწვევის პარლამენტში საკადრო გადაწყვეტილებების შესახებ კონსულტაციები ჯერ კიდევ გრძელდება. მმართველი გუნდის წარმომადგენლები ამ დრომდე თავს იკავებენ საკითხზე საუბრისგან, თუმცა ვრცელდება ინფორმაცა რამდენიმე გადაწყვეტილების შესახებ.
კერძოდ, ,,ჯი-ეიჩ-ენის“ ინფორმაციით, „ქართული ოცნება” პარლამენტში რამდენიმე ფრაქციის შექმნას გეგმავს და ერთ-ერთ ფრაქციას - „ქართული ოცნება“, მამუკა მდინარაძე უხელმძღვანელებს.
რაც შეეხება საპარლამენტო კომიტეტებს - წყაროს ინფორმაციით, მათ შორის ვინც კომიტეტის ხელმძღვანელის პოზიციას შეინარჩუნებს, ეკა ბესელია იქნება. საგარეო ურთიერთობათა კომიტეტის თავმჯდომარის თანამდებობაზე კი, მმართველი გუნდი პარტიის ახალ სახეს სოფიო ქაცარავას წარადგენს.
მმართველ გუნდში მიმდინარე კონსულტაციებზე განიხილება ასევე, პარლამენტის პირველი ვიცე-სპიკერის მანანა კობახიძის შემცვლელის საკითხი და სავარაუდო კანდიდატად თამარ ჩუგოშვილი სახელდება. მანანა კობახიძის შეცვლის აუცილებლობას კი, წყაროს ინფორმაციით, გუნდში მხოლოდ პარლამენტის მომავალ თავმჯდომარესთან - ირაკლი კობახიძესთან მის მოგვარეობას უკავშირებენ. ,,მანანა კობახიძეს ვიცე-სპიკერობის დათმობა ირაკლი კობახიძის გამო მოუწევს. გუნდში დაუშვებლად მიიჩნევენ პარლამენტის თავმჯდომარე და მისი პირველი მოადგილე ერთი და იმავე გვარის იყონ“ - განუცხადეს ,,ჯი-ეიჩ-ენს“
წყაროს ინფორმაციით, პარლამენტის თავმჯდომარის თანამდებობაზე „ქართული ოცნების“ აღმასრულებელი მდივანის ირაკლი კობახიძის წარდგენის შესახებ შეთანხმება მიღწეულია.
