საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტოს მხარდაჭერით, 3-დან 7 ნოემბრის ჩათვლით თბილისში «Mercedes-Benz Fashion week» გაიმართება. თბილისის თანამედროვე ხელოვნების მუზეუმში «MOMA” 2017 წლის გაზაფხული/ზაფხულის კოლექციებს 41 ქართველი და უცხოელი დიზაინერი წარმოადგენს.
როგორც წინა სეზონზე ამჯერადაც «Mercedes-Benz Fashion week»-ის ერთ-ერთი მთავარი პარტნიორია მეწარმეობის განვითარების სააგენტო, რომლის დახმარებით საქართველოში ჩამოდიან გავლენიანი და მსოფლიოში ცნობილი მყიდველები (ე.წ ბაიერები) ისეთი კომპანიებიდან როგორიცაა Eizenstein London, La Rinascente M Collective Store/Milan, Lane Crawford / Milan, AIZEL Moscow ა.შ
ხვალ, 3 ნოემბერს 10:00 საათზე სასტუმრო «Rooms»-ში მოდის სფეროთი დაინტერესებული ქართველი და უცხოელი ჟურნალისტებისთვის დაგეგმილია პრესკონფერენცია, რომელსაც დაესწრება მეწარმეობის განვითარების სააგენტოს დირექტორი ანა კვარაცხელია, Mercedes-Benz Fashion week-ის ორგანიზატორი სოფო ჭყონია და თბილისში სპეციალურად ამ ღონისძიებისთვის ჩამოსული სტუმრები.
აღსანიშნავია, რომ მეწარმეობის განვითარების სააგენტოს მხარდაჭერით საქართველოში გამართულ მოდის კვირეულებს უცხოელი მყიდველები მუდმივად სტუმრობენ, რაც შემოქმედებითი ინდუსტრიის ფარგლებში, ხელს უწყობს ქართველი დიზაინერებისა და მათი პროდუქციის საერთაშორისო მასშტაბით პოპულარიზაციას. ერთ-ერთი თვალსაჩინო მაგალითია ის ფაქტი, რომ ქართველი დიზაინერების პროდუქცია უკვე იყიდება ისეთ ტრენდულ და მოდის სამყაროში ცნობილ ვებგვერდებზე როგორებიცაა Farfetch და Modaoprandi.
რამდენიმე წარმატებული მოდის კვირეულის შემდეგ თბილისი მსოფლიო მოდის დედაქალაქების სიას შეუერთდა და Mercedes-Benz Fashion week»-ის მსოფლიო კალენდარში შევიდა. წინა სეზონზე გამართულ მოდის ჩვენებებს 300-ზე მეტი პუბლიკაცია და რეპორტაჟი მოჰყვა. მოდის კრიტიკოსებმა თბილისს აღმოსავლეთ ევროპის მოდის დედაქალაქი უწოდეს და ნიჭიერი დიზაინერების გასაცნობად თბილისისკენ ბილეთის ყიდვა ურჩიეს. Elle, Vogue, Grazia , Harper’s Bazaar, Online Forbes, Marie Claire ჟურნალისტები, ფოტოგრაფები, ბლოგერები და რედაქტორები სულ მალე ისევ საქართველოს დედაქალაქში მოიყრიან თავს.
