ვვარაუდობ, რომ ადრე თუ გვიან, „ნაციონალური მოძრაობის“ გუნდში და ფრაქციაში რღვევა მოხდება, - განაცხადა სოციოლოგმა, ვალერიან გორგილაძემ გადაცემა 2030-ში.

„მიხეილ სააკაშვილი „ნაციონალური მოძრაობის“ დამფუძნებელია და მისი პარტიიდან განდევნა რთულია, მაგრამ მიხეილ სააკაშვილისგან ემანსიპირება „ნაციონალური მოძრაობისთვის“ აუცილებელია, რადგან ის არის ფაქტორი, რომელიც პარტიის განვითარების შესაძლებლობას მნიშვნელოვნად აფერხებს. ვფიქრობ, მიხეილ სააკაშვილს პარტიის რიგითი წევრები უფრო უჭერენ მხარს, ვიდრე დღევანდელი საპარლამენტო ფრაქციის წევრები და  მაღალი ალბათობით შესაძლოა, ფრაქციის წევრებსა და პარტიის რიგით წევრებს შორის დაპირისპირება მოხდეს“, - განაცხადა გორგილაძემ.

სოციოლოგმა“რესპუბლიკურ პარტიაში“ მიმდინარე პროცესთან დაკავშირებითაც ისაუბრა და აღნიშნა, რომ პარტიის ბირთვის დაშლა ძმები ბერძენიშვილების ტანდემის მიერ საკითხების ვოლუნტარისტულად გადაწყვეტამ განაპირობა.   

„ბერძენიშვილები ამ პოლიტიკური ორგანიზაციის დამფუძნებლები არიან, მაგრამ სააკაშვილის არ იყოს, ისინი პარტიის განვითარებას აფერხებდნენ და როგორც ჩანს, დავით უსუფაშვილმა ჩათვალა, რომ მათგან უნდა გათავისუფლებულიყო. უსუფაშვილი ქართულ პოლიტიკაში ფაქტორს წარმოადგენს. შესაძლოა, ის სხვა პოლიტიკოსებისთვის მიზიდულობის ცენტრად იქცეს და შეიქმნას კლასიკური ევროპული პოლიტიკური ორგანიზაცია, რომელიც ეროვნულ-გენეტიკურ თუ რაღაც ამდაგვარ კოდზე დაფუძნებული იქნება. დავით უსუფაშვილს აქვს შანსი, მესამე პოლიტიკური ძალა შექმნას, რომელიც ორი-სამი წლის შემდეგ შესაძლოა, მნიშვნელოვან აქტორად იქცეს. შესაძლოა, მოხდეს გარკვეული შეზღუდვა იმ რადიკალური ლიბერალური რიტორიკისა, რომელიც „რესპუბლიკელებისგან“ გვესმოდა“, - განაცხადა გორგილაძემ.

მისი თქმით, ქართულ პოლიტიკაში არარაციონალური ქცევები, ემოციები და ლიდერების პიროვნული ამბიციები მნიშვნელოვან ფაქტორს წარმოადგენს.

„პოლიტიკოსებისთვის შეუძლებელი ხდება გაერთიანებების შექმნა იმ პერმანენტული  შეურაცხყოფის გამო, რომელსაც ერთმანეთს აყენებენ.  „თავისუფალ დემოკრატებსა“ და „რესპუბლიკელებს“ გაერთიანება რომ მოეხდინათ, დღეს ისინი პარლამენტში გარანტირებულად იქნებოდნენ, მაგრამ ეს ვერ მოახერხეს. უსუფაშვილი ამ ტიპის თანამშრომლობისთვის ბევრად უფრო ღიაა, როგორც პოლიტიკოსი ბევრად უფრო პრაგმატულია და ალასანიასთან ერთად, თუ მის გარეშე, ის გუნდის შექმნას მოახერხებს“, - განაცხადა ვალერიან გორგილაძემ.