დღეიდან საქართველოს მთელ ტერიტორიაზე, მიმოქცევაში 100 ლარის ნომინალის განახლებული ბანკნოტები გამოვიდა, ის მიმოქცევაში ძველი ემისიების ბანკნოტებთან ერთად იქნება.
100 ლარის ნომინალის განახლებულ ბანკნოტზე შენარჩუნებულია კარგად ნაცნობი, ლარის ბანკნოტების თავდაპირველი თემატიკა, ამავდროულად ბანკნოტზე წარმოდგენილი ისტორიები გამრავალფეროვნებულია ცალკეული ახალი ელემენტებით. განახლებული დიზაინი კიდევ უფრო მეტი სიზუსტით და თანამედროვე იერსახით წარმოაჩენს საქართველოს მნიშვნელოვან კულტურულ-ისტორიულ მემკვიდრეობას.
100 ლარის ნომინალის განახლებული ბანკნოტები დაცულია მომხმარებლისათვის მარტივად აღქმადი და ამავე დროს, თანამედროვე და მაღალტექნოლოგიური პროცესის შედეგად მიღებული დამცავი ნიშნებით. მათ შორის დატანილია ნომინალის ამომცნობი ნიშანი სუსტი მხედველობის მქონე პირთათვის.
ლარის განახლებული ბანკნოტები დამზადებულია ისეთი მასალებისა და დამცავი მექანიზმების გამოყენებით, რომლებიც ზრდის მიმოქცევაში მათ მდგრადობას დაბინძურებისა და ბუნებრივი ცვეთისადმი.
ინფორმაციისთვის, 100 ლარის ნომინალის ბანკნოტები 20 და 50 ლარის ნომინალის ბანკნოტებთან ერთად განახლდა. შეგახსენებთ, რომ 20 და 50 ლარის ნომინალის განახლებული ბანკნოტები მიმოქცევაშია 2016 წლის 1 თებერვლიდან. რაც შეეხება 5 და 10 ლარის ნომინალის ბანკნოტებს განახლდება მოგვიანებით.
აღსანიშნავია, რომ განახლებულმა ლარმა პირველი საერთაშორისო აღიარება უკვე მოიპოვა. 2016 წლის 15 მარტს, ბუქარესტში HSP™ Europe - ის კონფერენციაზე ორგანიზებულ დაჯილდოების ცერემონიალზე ევროპისა და დსთ–ს ქვეყნების მასშტაბით საუკეთესო რეგიონალური ბანკნოტის ნომინაციაში "2016 წლის საუკეთესო რეგიონალური ბანკნოტების სერია" ლარის განახლებული ბანკნოტების სერიამ (20, 50 და 100 ლარის ნომინალის ბანკნოტები) გაიმარჯვა.
„დღეიდან საქართველოს მთელს ტერიტორიაზე მიმოქცევაში გამოვიდა განახლებული 100 ლარიანი ბანკნოტები. ის მიმოქცევაში იქნება წინა ემისიის ბანკნოტებთან ერთად. განახლებულ ბანკნოტებზე დატანილია მოსახლეობისათვის მარტივად აღქმადი თანამედროვე დამცავი ნიშნები და მნიშვნელოვნად არის გაუმჯობესებული ტექნიკური მახასიათებლები.
შესაბამისად უკვე მიმოქევაში გაქვს განახლებული 20, 50 და 100 ლარიანი ბანკნოტები. ხოლო რაც შეეხება 5 და 10 ლარიან ბანკნოტებს მათი განახლება მოხდება მომდევნო წლებში.
განახლებულმა ლარის ბანკნოტებმა უკვე მოიპოვეს საერთაშორისო აღიარება. ბუქარესტში გამართულ რეგიონალურ კონკურსში ევროპისა და დსთ-ს მასშტაბით ლარის განახლებულმა ბანკნოტები 2016 წლის საუკეთესო ბანკნოტების სერიად დასახელდა“, განაცხადა ეროვნული ბანკის აღმასრულებელმა დირექტორმა გიორგი მელაშვილმა, რომელმაც დღეს ჟურნალისტებს განახლებული 100 ლარის ნომინალის ბანკნოტები წარუდგინა.
განახლებული 100 ლარის ნომინალის ბანკნოტების შესახებ დაწვრილებითი ინფორმაციის მისაღებად შეგიძლიათ ეწვიოთ სპეციალურ ვებგვერდს -www.ganakhlebulilari.ge
