”ქართული ოცნების” წარმომადგენელ ეკა ბესელიას შეფასებით, ძალიან სწორი იყო გადაწყვეტილება, რომ არჩევნებში ”ქართულმა ოცნებამ” მარტო მიიღო მონაწილეობა, რადგან დასრულდა მუდმივი დაყვედრების პერიოდი ზოგიერთი პარტნიორის მხრიდან.
მისი თქმით, კიდევ ერთელ გაიზომა ყველა პოლიტიკური პარტიის ნდობის ხარისხი.
”საპარლამენტო არჩევნების შედეგებმა იმდენად ნათელი გახადა, თუ როგორია პარტიების მიმართ ჩვენი ამომრჩევლის მხარდაჭერა და ნდობა, რომ საჭიროა ყველა პოლიტიკურმა პარტიამ საკუთარი შესაძლებლობები რეალურად შეაფასოს. ძალიან სწორი გადაწყვეტილება იყო, რომ ჩვენ მარტო მივიღეთ არჩევნებში მონაწილეობა, რადგან დასრულდა დაყვედრების და მუდმივად მოძღვრის როლში ყოფნის პერიოდი, როდესაც ჩვენი რამდენიმე ყოფილი პარტნიორი ამ როლიდან გველაპარაკებოდა იმ პოლიტიკურ პარტიას, რომელსაც ხალხმა არჩევნებში ასეთი მაღალი ნდობა გამოუცხადა. ეს არჩევნები იყო შთამბეჭდავი ამ თვალსაზრისითაც, როდესაც კიდევ ერთელ და უკვე ახალ ეტაპზე გაიზომა ყველა პოლიტიკური პარტიის ნდობის ხარისხი”, - განუცხადა ჟურნალისტებს ეკა ბესელიამ.
