„ქართული ოცნება-დემოკრატიული საქართველოს“ აღმასრულებელი მდივნის, ირაკლი კობახიძის ინფორმაციით, ახალციხე-ადიგენის ოლქში მანქანით მოძრაობენ „ნაციონალური მოძრაობის“ ლიდერები, გივი თარგამაძე და გოკა გაბაშვილი, რომლებიც მითითებებს აძლევენ თავიანთ აქტივისტებს უბნებზე არჩევნების ჩაშლასთან დაკავშირებით.
როგორც კობახიძემ მორიგ ბრიფინგზე განაცხადა, მოვუწოდებს „ნაციონალურ მოძრაობას“, თავი შეიკავონ ასეთი ქმედებებისგან.
„ასეთი რამ არის კანონდარღვევა და არ დარჩება არც ერთ შემთხვევაში დაუსჯელი. მოვუწოდებთ ჩვენს აქტივისტებს, საარჩევნო ადმინისტრაციას, რომ მაქსიმალური სიფრთხილე გამოიჩინონ ასეთი ტიპის პროვოკაციების მიმართ“,-აღნიშნა კობახიძემ.
ამასთან, კობახიძის ინფორმაციით, რუსთავის მაჟორიტარულ საარჩევნო ოლქში შეინიშნება კონცენტრაცია „ნაციონალური მოძრაობის“ წარმომადგენლების და არსებობს გარკვეული ეჭვი ამ უბანზე პროვოკაციის მოწყობასთან დაკავშირებით.
„აქაც გვაქვს იგივე მოწოდება - არ განახორციელონ არავითარი პროვოკაცია. ეს არ დარჩება დაუსჯელი. კიდევ ერთხელ მოვუწოდებთ ჩვენს აქტივისტებს, მხარდამჭერებს, რომ მაქსიმალურად მოერიდონ პროვოკაციებს, არ წამოეგონ პროვოკაციებს და ყველა ასეთ შემთხვევაზე დაუკავშირდნენ სამართალდამცავ ორგანოებს“,-აღნიშნა ირაკლი კობახიძემ.
