ევროკავშირი ამაყობს, რომ თქვენ ხართ მოდელი იმისა, თუ როგორ უნდა გამოიყენოს ქვეყანამ ევროკავშირის დახმარება, - განაცხადა საქართველოში ევროკავშირის ელჩმა იანოშ ჰერმანმა პრემიერ-მინისტრ გიორგი კვირიკაშვილთან ერთად გამართულ პრესკონფერენციაზე, სადაც ევროკავშირის მიერ საქართველოს მმართველობითი რეფორმისთვის 30 მილიონი ევროს ოდენობის გრანტის გამოყოფაზე ისაუბრეს.
ჰერმანის განცხადებით, საჯარო მმართველობის რეფორმა არის ერთ-ერთი მთავარი ამოცანა და მიზანი ასოცირების შეთანხმების და ღრმა და ყოვლისმომცველი თავისუფალი ვაჭრობის შეთანხმების ფარგლებში.
„ეჭვი არ გვაქვს და ვაღიარებთ ყველანი, რამდენად მნიშვნელოვანია საჯარო მმართველობა და მისი რეფორმა. 30 მილიონი ევრო 4 წლის ვადაში უნდა აითვისოს ქვეყანამ. ეს დახმარება იქნება, როგორც ფინანსური, ასევე ტექნიკური დახმარების სახით, იმისათვის, რომ ჩვენი ექსპერტული ცოდნა გამოიყენოთ მაქსიმალურად. მთავრობა ძალიან მნიშვნელოვან როლს თამაშობს ამ გარდაქმნის პროცესში. რამოდენიმე სამინისტრო და უწყება იქნება უშუალო ბენეფიციარი პროგრამის.
ბატონო პრემიერ-მინისტრო, მინდა მადლობა გადაგიხადოთ პირადად ამ საერთო მიზნების მიმართ ყურადღებისთვის, ამ დიალოგისთვის, რომელიც საქართველოს მთავრობას და ევროკავშირს გააჩნია. ამ პროგრამის მომზადების მთელ ეტაპზე თქვენი სულისკვეთება იყო წარმმართველი. თქვენ ხართ ამ პროგრამის მმართველი, ეს არის თქვენი პროგრამა და მთელი განხორციეელების ეტაპზე დიდი წარმატების იმედი მაქვს“, -განაცხადა იანოშ ჰერმანმა.
