„კონვენტ ჯორჯიამ“ ხელშეკრულებით ნაკისრი ვალდებულებები ვერ შეასრულა და ბათუმში ხელმისაწვდომი საცხოვრისის მშენებლობა ვადაზე ადრე შეწყვიტა. როგორც ბათუმის მერიაში განმარტავენ, ბათუმში ხელმისაწვდომი საცხოვრისის მშენებლობის მიზნით ქ. ბათუმის მუნიციპალიტეტის მერიასა და უცხოური საწარმოს ფილიალ ,,კონვენტ ჯორჯიას“ შორის სახელმწიფო შესყიდვის შესახებ #268 ხელშეკრულება 2015 წლის 15 დეკემბერს გაფორმდა.
ხელშეკრულების შესაბამისად, აღნიშნულმა კომპანიამ აიღო საცხოვრებელი სახლის მშენებლობისა და მიმდებარე ტერიტორიის კეთილმოწყობის ვალდებულება ხელშეკრულების გაფორმებიდან ერთი წლის განმავლობაში.
ხელშეკრულების ფასი განისაზღვრა 4.279.990 ლარით.
,,კონვენტ ჯორჯიას“ მიერ ფაქტიურად შესრულებული სამუშაოების ღირებულებამ შეადგინა 251.109,43 ლარი, რის შემდეგაც კომპანიამ შეწყვიტა სამშენებლო სამუშაოების წარმოება და მიუხედავად მერიის შესაბამისი სამსახურების არაერთი წერილობითი თუ ზეპირი გაფრთხილებისა, არ მოხდა ხელშეკრულებით გათვალისწინებული სამუშაოების გაგრძელება.
აღნიშნულიდან გამომდინარე, ქ. ბათუმის მუნიციპალიტეტის მერიის მიერ 2016 წლის 19 ოქტომბერს შეწყდა ,,კონვენტ ჯორჯიასთან“ დადებული ხელშეკრულება, რის გამოც, მიმწოდებელ კომპანიას, ხელშეკრულების პირობების შესაბამისად, დაეკისრა პირგასამტეხლო ხელშეკრულების საერთო ღირებულების 5%-ის ოდენობით, რაც შეადგენს 213.999,50 ლარს.
ბათუმის მერიის განმარტებით, ხელშეკრულების ფარგლებში, საბანკო გარანტიის საფუძველზე ავანსის სახით გაცემულია 1.621.185,41 ლარი, საიდანაც, შესრულებული სამუშაოების გათვალისწინებით კომპანიის მიერ უკან დასაბრუნებელი თანხა შეადგენს 1.430.342,24 ლარს.
მიმდინარე ეტაპისათვის ქ. ბათუმის მუნიციპალიტეტის მერია ახორციელებს ხელშეკრულების შეწყვეტიდან გამომდინარე საქართველოს კანონმდებლობით გათვალისწინებულ ღონისძიებებს.
ამ დროისთვის ქ. ბათუმის მუნიციპალიტეტის მერია გეგმავს ხელშეკრულების უზრუნველყოფის და ავანსის უზრუნველყოფის საბანკო გარანტიების ამოქმედებას, ავანსის თანხის ნაშთის - 1.430.342,24 ლარის დაბრუნებას და დაკისრებული პირგასამტეხლოს თანხის 213.999,50 ლარის გადახდევინებას.
