ცესკოში გამართულ მორიგ საინფორმაციო ბრიფინგზე ცესკოს სპიკერმა ანა მიქელაძემ მედიას ამორმჩეველთა აქტივობის შესახებ გააცნო ინფორმაცია. 12:00 სთ-ის მდგომარეობით მარნეულის მუნიციპალიტეტის №48-ე საარჩევნო უბანზე 296 ამომრჩეველი გამოცხადდა, რაც აღნიშნულ უბანზე რეგისტრირებული ამომრჩევლების 20.6%-ია, ხოლო ზუგდიდის მუნიციპალიტეტში სამივე უბანზე ჯამში 525 ამომრჩეველი გამოცხადდა, რაც ამ უბნებზე რეგისტრირებული ამომრჩევლების 18.46%-ია. ამ დროისთვის ყველა საარჩევნო უბანზე ხმის მიცემის პროცესი მშვიდ ვითარებაში მიმდინარეობს.
ცესკოს სპიკერმა ასევე ისაუბრა საჩივრების შესახებ. როგორც ანა მიქელაძემ აღნიშნა,
მარნეულის მუნიციპალიტეტის №48-ე საარჩევნო უბანზე 7 საჩივარი დაიწერა, რომლებიც შეეხება მცირედ პროცედურულ ხარვეზებს.
„მაგალითად, ერთ-ერთ საჩივარში აღნიშნულია, რომ თითქოს კენჭისყრის პროცესი დაიწყო 15 წუთის დაგვიანებით. თუმცა, საარჩევნო ადმინისტრაციამ გადაამოწმა ინფორმაცია და უნდა აღინიშნოს, რომ საარჩევნო უბანი უკვე დილის 8:00 საათიდან იყო მზად პირველი ამომრჩევლის მისაღებად. პირველი ამომრჩეველი საარჩევნო უბანზე შევიდა 08:15 წუთზე. შესაბამისად, როდესაც უბანზე პირველი ამომრჩეველი შევიდა, მაშინ დაიწყო კენჭისყრის პროცესიც; აღნიშნულ საარჩევნო უბანზე ყოფნის უფლებამოსილი პირების დიდმა რაოდენობამ გამოიწვია გარკვეული პროცესების შეფერხება.
ასევე, ერთ-ერთ საჩივარში მითითებულია, რომ კომისიის თავმჯდომარემ ხმამაღლა არ გამოაცხადა არჩევნებთან დაკავშირებული სხვადასხვა ტიპის ინფორმაცია. აღნიშნული გადამოწმდა საარჩევნო ადმინისტრაციის მიერ და რამდენადაც ჩვენთვის ცნობილია, უბანზე დიდი რაოდენობით უფლებამოსილი პირების ყოფნის და ხმაურის გამო, ზოგიერთმა მათგანმა ვერ გაიგო ხმაურში გამოცხადებული ინფორმაცია;
საჩივრები, ასევე შეეხება თავად ამომრჩევლების მიერ კაბინის გარეთ ხმის მიცემის მცდელობის განხორციელების ერთეულ ფაქტებს, რაც კომისიის მხრიდან მითითების შემდეგ აღმოიფხვა.
ერთი საჩივარი შევიდა ზუგდიდის საოლქო საარჩევნო კომისიაში. საჩივარში მითითებულია, რომ საკრებულოს წევრი, საარჩევნო უბნაზე იმყოფებოდა ერთ-ერთი არასამთავრობო ორგანიზაციის ეგიდით და აკვირდებოდა მიმდინარე პროცესებს. ინფორმაციის მიღების შემდეგ, რა თქმა უნდა, საარჩევნო ადმინისტრაციამ აღნიშნულ პიროვნებას შეუწყვიტა საარჩევნო უბანზე ყოფნის უფლებამოსილება.
გარდა ამისა, ზუგდიდის №38 საარჩევნო უბანზე დაწერილ საჩივარში, მითითებულია, თითქოს გადასატანი ყუთი უბნიდან გაიტანეს დაგვიანებით, 09.05 სთ-ზე. აღნიშნული არ წარმოადგენს კანონმდებლობის დარღვევას, ვინაიდან საარჩევნო ყუთი უბნიდან უნდა გაიტანონ 09:00 სთ-იდან ნებისმიერ დროს და საარჩევნო უბანზე უნდა დაბრუნდეს საღამოს 07:00 სთ-მდე.
კიდევ ერთხელ შეგახსენებთ, რომ საარჩევნო კანონმდებლობის მიხედვით, დღეს, კენჭისყრის შენობაში იკრძალება აგიტაცია. ასევე, აკრძალულია წინაასარჩევნო ფასიანი და უფასო რეკლამის განთავსება ტელევიზიასა და რადიოში. დღეს, საღამოს 8:00 საათამდე იკრძალება არჩევნებთან დაკავშირებული საზოგადოებრივი აზრის გამოკითხვის შედეგების გამოქვეყნებაც,“ - განაცხადა ანა მიქელაძემ ცესკოში გამართულ საინფორმაციო ბრიფინგზე.
