ბათუმის ბოტანიკურ ბაღსა და შპს „აჭარისწყალ ჯორჯია“-ს შორის საგრანტო ხელშეკრულება გაფორმდა. აღნიშნული დაფინანსებით, გოდერძის ალპურ ბაღში მოხდება მზის ენერგიის სისტემის და პარკინგის მოწყობა, დროებითი ადმინისტრაციული შენობის მშენებლობა და აღჭურვა, საპიკნიკე ადგილისა და ბუნებრივი ბილიკების მოწყობა, სეპტიკისა და კანალიზაციის მოწყობა, ეკო ტუალეტებისა და ბილეთების ჯიხურის მშენებლობა, საინფორმაციო ნიშნულებისა და დაფების, რუკების, ბროშურების დიზაინის შემუშავება და ბეჭდვა, ასევე, მეფუტკრის სახლის მშენებლობა და მეფუტკრეობის განვითარებისათვის საჭირო ინვენტარით აღჭურვა და ფუტკრის ოჯახების შეძენა.
ალპური ბაღის მშენებლობა და განვითარება მიმდინარეობს მცირე კავკასიის ალიანსების პროგრამის მხარდაჭერით, რომელსაც არასამთავრობო ორგანიზაცია „მერსი ქორფსი“ შვეიცარიის განვითარებისა და თანამშრომლობის სააგენტოს დაფინანსებით ახორციელებს.
ხელშეკრულებით განსაზღვრული გრანტის გაცემა მიზნად ისახავს მხარეებმა ხელი შეუწყონ გოდერძის ალპური ბაღის დაარსებასა და განვითარებას, რომელიც იქნება სოფლად ტურიზმის, საგანმანათლებლო და საკვლევი მდგრადი რეგიონალური ცენტრი, სოფლის მდგრადი განვითარების საუკეთესო პრაქტიკის სადემონსტრაციო კერა. პროექტის მიზანია, ასევე, ხელი შეუწყოს ბოტანიკურ ბაღს ადგილობრივად სპეციფიკურ მცენარეთა მრავალფეროვნების შენარჩუნებაში, უზრუნველყოს რელიქტური, ენდემური, იშვიათი, საკვები, სამკურნალო, სამეურნეო, დეკორატიული და სხვა სასარგებლო თვისებებით გამორჩეული სახეობათა კონსერვაცია და მათი გამოყენება სამეცნიერო, საგანმანათლებლო, შემეცნებითი და ტურისტული მიზნებისათვის.
საგრანტო თანხა 100 ათას ამერიკულ დოლარს შეადგენს.
