მაღალმთიან თუშეთში მდებარე სოფლების დართლოსა და ჩიღოს დამაკავშირებელი საავტომობილო გზის მშენებლობის მიზნით გამოცხადებულ ტენდერში გამარჯვებულად გამოცხადდა შპს „ვლადნეფტპროდუქტის წარმომადგენლობა საქართველოში“. ინფორმაციას ამის შესახებ ,,კახეთის საინფორმაციო ცენტრი“ ავრცელებს და იუწყება, რომ ამ ორგანიზაციის დამფუძნებელი და 100% წილის მესაკუთრეც რუსული კომპანია „ვლადნეფტპროდუქტია“. საწარმოს ადგილსამყოფელია ჩრდილოეთ ოსეთის (ალანია) ქალაქი ვლადიკავკაზი, სტავროპოლის ქ. №6ა.
საწარმო 2010 წლის 3 ივნისს დაფუძნდა, ხოლო მისი შვილობილი კომპანია საქართველოში 2015 წლის 21 მაისს დარეგისტრირდა.
ახმეტის მუნიციპალიტეტის გამგეობამ ელექტრონული ტენდერი 2016 წლის 21 ივლისს გამოაცხადა. ტენდერში მონაწილეობის მსურველებს წინადადებების წარდგენა 6 აგვისტოდან 11 აგვისტომდე შეეძლოთ. დაახლოებით 6,5 კმ სიგრძის საავტომობილო გზის მშენებლობისთვის სახელმწიფო და ადგილობრივი ბიუჯეტიდან საერთო ჯამში 736 316 ლარი იქნა გამოყოფილი. სატენდერო პირობების მიხედვით, სამშენებლო სამუშაოების პირველი ეტაპი 2016 წლის 10 ოქტომბრამდე უნდა დასრულებულიყო, ხოლო მეორე ეტაპის განხორციელება 2017 წლის 10 მაისიდან 15 ოქტომბრამდე პერიოდშია დაგეგმილი. ამასთან, ტენდერში მონაწილე პრეტენდენტებს მოეთხოვებოდათ 2014 წლის 1 იანვრიდან 2016 წლის 1 ივლისამდე პერიოდში მინიმუმ 3 000 000 (სამი მილიონი) ლარის ღირებულების გზების მოწყობისა და სამშენებლო სამუშაოების შესრულების გამოცდილება.
ელექტრონულ ტენდერში მონაწილეობა ოთხმა კომპანიამ მიიღო, რომელთა საბოლოო შეთავაზებები შემდეგნაირი იყო: შპს „ინტეგრალი XXI“ - 550 000 ლარი; შპს „ორბიტა“ - 589 054 ლარი; შპს „გზამშენი 2005“ - 647 331 ლარი; შპს „ვლადნეფტპროდუქტის წარმომადგენლობა საქართველოში“ - 695 000 ლარი.
ახმეტის გამგეობაში შექმნილი სატენდერო კომისიის გადაწყვეტილებით, ტენდერში მონაწილე სამი პრეტენდენტი ეტაპობრივად იქნა დისკვალიფიცირებული ტექნიკური დოკუმენტაციის წარუდგენლობისა და არასრულყოფილების გამო, რის გამოც ტენდერში გამარჯვებულის გამოვლენა იმდენად გაჭიანურდა, რომ სამუშაოების შესრულების პირველი ეტაპის ვადები დაირღვა.
საბოლოოდ კი, სატენდერო კომისიის 17 ოქტომბრის გადაწყვეტილებით (ოქმი №7), ტენდერში გამარჯვებულად რუსული კომპანიის წარმომადგენლობა გამოცხადდა. ოფიციალურად გამოქვეყნებული დოკუმენტაციის შესაბამისად, შპს „ვლადნეფტპროდუქტის წარმომადგენლობა საქართველოში“ სატენდერო მოთხოვნებს სრულად აკმაყოფილებს - მას ბოლო ორი წლის განმავლობაში სულ შესრულებული აქვს დაახლოებით 27 მილიონ ლარზე მეტი ღირებულების სამუშაოები, აქედან, თითქმის 5 მილიონის ლარის სამუშაოები კი საქართველოში შეასრულა. ასევე გააჩნია დაგეგმილი სამუშაოების შესასრულებლად საჭირო მანქანა-დანადგარები და სხვა ტექნიკა. კომპანიის მიერ შესრულებულ სამუშაოებს შორისაა წყალტუბოში სოფ. ცხუკურის №1 საჯარო სკოლის შენობის რეაბილიტაცია, გარდაბნის მუნიციპალიტეტის სოფლებში სასმელი წყლის სისტემების რეაბილიტაცია და საკანალიზაციო სისტემის შეკეთება, ახმეტასა და თიანეთში ნაპირსამაგრი ნაგებობების გაკეთება, ქალაქ თბილისში, საბურთალოზე სკვერისა და სანიაღვრე არხების მოწყობა, ზესტაფონში გზების რეაბილიტაცია და სხვა.
