საქართველოში ჩატარებულ საპარლამენტო არჩევნებთან დაკავშირებით აშშ-ის სახელმწიფო დეპარტამენტმა ოფიციალური განცხადება გაავრცელა. ჯონ ქერის უწყება საპარლამენტო არჩევნებს დადებითად აფასებს.
განცხადებაში აღნიშნულია, რომ შეერთებული შტატები საქართველოს მოსახლეობას 8 ოქტომბერს კონკურენტუნარიანი, კარგად ორგანიზებული არჩევნების ჩატარებას ულოცავს. ასევე ნათქვამია, რომ ეუთო-ს დემოკრატიული ინსტიტუტებისა და ადამიანის უფლებათა ოფისის შეფასებით, საპარლამენტო არჩევნებმა ძირითადი ფუნდამენტური უფლებების პატივისცემით ჩაიარა და მან რეგიონში საქართველოს, როგორც დემოკრატიული რეფორმების ლიდერი ქვეყნის სტატუსს გაუსვა ხაზი.
ასევე ყურადღება გამახვილებულია არჩევნებზე გამოვლენილ დარღვევებზეც.
„უნდა აღინიშნოს, რომ არჩევნებმა მშვიდად ჩაიარა, თუმცა დღის განმავლობაში ადგილი ჰქონდა რამდენიმე ძალადობრივ ინციდენტს საარჩევნო უბნებზე.“ - ნათქვამია განცხადებაში და ასევე აღნიშნულია, რომ შეერთებული შტატები მკაცრად გმობს ძალადობისა და დაშინების ცალკეულ შემთხვევებს. ქერის უწყება ყველა ამ ინციდენტის დეტალურ და დაბალანსებულ გამოძიებას მოითხოვს.
სახელმწიფო დეპარტამენტი პოლიტიკურ პარტიებსა და მათ მხარდამჭერებს მოუწოდებს, მეორე ტურამდე პერიოდი მშვიდად გაიარონ.
„ამერიკის შეერთებული შტატები იმედოვნებს, რომ საქართველოსთან მჭიდრო თანამშრომლობას განაგრძობს და ყოველთვის დაუჭერს მხარს საქართველოს პოლიტიკურ - ეკოენომიკურ განვითარებასა და ქვეყნის სწრაფვას ევრო -ატლანტიკური სტრუქტურებისკენ. „- ნათქვამია განცხადებაში.
