”ქართული ოცნების” ერთ-ერთი ლიდერის, ნუკრი ქანთარიას განცხადებით, პარლამენტი დედაქალაქს უნდა დაუბრუნდეს. დღეს გამართულ პრესკონფერენციაზე მან განაცხადა, რომ ჯერ ადრეა საუბარი საკონსტიტუციო უმრავლესობასთან დაკავშირებით, თუმცა ასეთ შემთხვევაში, მისი თქმით, ერთ-ერთიი პირველი საკითხი პარლამენტის ადგილმდებარეობაც იქნება.
,,ვფიქრობთ, მართლები ვიქნებით, თუ დედაქალაქს დაუბრუნდება პარლამენტი. ძალიან ბევრი დრო, ხარჯი არის ამ გზაში. ძალიან ბევრი თითქმის შეეწირა კიდეც გზას, იყო ავარიებიც და ვერ ხერხდებოდა კომუნიკაცია. ქუთაისს დიდად არაფერი მომატებია პარლამენტის იქ ყოფნით. ეს საკითხი კენჭისყრამდეა მისული წინა პარლამენტის პირობებში. თუ ჩვენ ეს გადაწყვეტილება მივიღეთ ნოემბერში, მაშინ საშემოდგომო სესიის მომდევნო სხდომა ჩატარდება თბილისში”, - განაცხადა ქანთარიამ.
მისი თქმით, მსჯელობა იქნება ასევე კიდევ ორ საკონსტიტუციო ცვლილებაზე, ქორწინების საკითხსა და პრეზიდენტის არჩევითობაზე.
”წინა პარლამენტმა ვერ მოახერხა არათუ საკონსტიტუციო ცვლილებების განხორციელება, არამედ კომისიამაც ვერ შეძლო მუშაობა და საკითხებიც კი ვერ დააყენა, რაზეც ძალიან მწყდება გული. ვფიქრობ, ძალიან საჭირო საქმეა საკონსტიტუციო ცვლილებები. შეიქმნება კომისია და იმ საკითხებს, რომელიც კენჭისყრამდეა მიყვანილი - ეს იქნება ქორწინების საკითხი თუ სხვა, ბუნებრივია, ჩვენ აუცილებლად ვუყრით კენჭს. რაც შეეხება პრეზიდენტის არჩევნებს, პრეზიდენტს აქვს ყველაზე დიდი ლეგიტიმაცია, ის არის საყოველთაო, სახალხო არჩევნებით არჩეული და მისი უფლებები არ შეესაბამება ამ ლეგიტიმაციას. აქ გვაქვს გარკვეული ნონსენსი”, - აღნიშნა ნუკრი ქანთარიამ.
