კენჭისყრის პროცესში იყო დარღვევები, თუმცა არც ისეთი, რომ არჩევნების შედეგებზე გავლენა მოახდინოს, - განაცხადა აჭარაში ,,საერთაშორისო გამჭვირვალობა საქართველოს“ წარმომადგენელმა, მალხაზ ჭკადუამ. მისი თქმით, რეგიონში დარღვევების დიდი ნაწილი ნაკლებად კვალიფიციური საუბნო საარჩევნო კომისიის წევრების შედეგად დაიწერა.
„იყო შემთხვევები, როცა არ შეუშვეს ჩვენი დამკვირვებელი უბანზე და ოლქის თავმჯდომარის ჩარევის შემდეგ მოახერხა დამკვირვებელმა უბანში შესვლა. გვქონდა შემთხვევები, როცა ერთი პარტიის ორი დამკვირვებელი იყო უბანზე და ჩვენი მითითების შემდეგ, საარჩევნო უბნის ადმინისტრაციამ მიიღო შესაბამისი გადაწყვეტილება, თუმცა ასეთი ტიპის საკითხებზე თავად უნდა რეაგირებდნენ”, - განაცხადა მალხაზ ჭკადუამ.
მისი განმარტებით, ასევე არის შემთხვევები, როცა აგიტაცია მიმდინარეობს უბნის გარეთ.
“ეს რა თქმა უნდა, პირდაპირ არ არის დარღვევა და საარჩევნო კოდექსი, უბნის შიგნით და ტერიტორიაზე ვრცელდება, თუმცა უსიამოვნოა და გარკვეულ დაძაბულობას ქმნის. დაძაბულობას ქმნის ასევე, მაღალი აქტივობა. ეს ერთის მხრივ ძალიან კარგია, თუმცა რეგისტრატორები ვერ ახერხებენ წესრიგის დაცვას და რამდენჯერმე პოლიციის გამოძახებაც გახდა საჭირო"- აღნიშნა ჭკადუამ.
