ახალგაზრდა იურისტთა ასოციაციის თავმჯდომარე, ანა ნაცვლიშვილი ამბობს, რომ დაფიქსირდა გარკვეული ტიპის დარღვევები. კერძოდ, თბილისში ნაძალადევის მეთვრამეტე უბანზე მოიპოვეს ქართული ოცნების მაჟორიტარი კანდიდატის სოფო კილაძის მხარდამჭერთა სია, რომელიც სავარაუდოდ ერთ-ერთ აქტივისტს დარჩა უბანზე.
სიის გადამოწმების შედეგად დადასტურდა, რომ იქ არიან ადამიანები, რომლებსაც თანხმობა არ მიუციათ სიაში ყოფნაზე.
„ეს მანკიერი პრაქტიკა უნდა აღმოიფხვრას“-აცხადებს ანა ნაცვლიშვილი და მოუწოდებს პოლიტიკურ პარტიებს, რომ თავი შეიკავონ ასეთი ქმედებებისგან.
მან ასევე ისაუბრა დიდუბის მეთოთხმეტე უბანზე მომხდარ ინციდენტზე, კერძოდ უბნის გახსნის შემდეგ საკონტროლო ფურცლის შევსების ნაცვლად მათ შემაჯამებელი ოქმები შეავსეს და შეცდომის გამოსწორების მიზნით დალუქულ ყუთი გახსნეს.
"კიდევ ერთხელ მინდა გავაკეთო მოწოდება კომისიების მისამართით, რომ მაქსიმალურად ხელი შეუწყონ დამკვირვებლების მუშაობას და კანონის შესაბამისად იმოქმედონ, განსაკუთრებით იმ შემთხვევაში, როცა არანაირი ეთიკური თუ კანონით დადგენილი წესები დამკვირვებლების მხრიდან არ ირღვევა, “-აცხადებს ნაცვლიშვილი.
ჟურნალისტებთან საუბრისას ანა ნაცვლიშვილმა აღნიშნა, რომ გავრცელებული ინფორმაცია, რომ მთაწმინდის მე-2 უბანთან ნაციონალური მოძრაობის მხრიდან ამომრჩევლის მოსყიდვას ჰქონდა ადგილი, გადამოწმდა და არ დადასტურდა.
ანა ნაცვლიშვილმა ასევე აღნიშნა, რომ ქუთაისში სასჯელაღსრულების დაწესებულებაში არსებული პრობლემა, რომელიც ფოტოგადაღების აკრძალვას უკავშირდებოდა, მინისტრის უშუალო ჩარევის შემდეგ აღმოიფხვრა.
