ლაგოდეხის საარჩევნო ოლქში, სოფელ მაწიმის საარჩევნო უბანზე ამომრჩევლებზე გაცემული მაჟორიტარული ბიულეტენები სხვა საარჩევნო ოლქის აღმოჩნდა. კახეთის საინფორმაციო ცენტრის ინფორმაციით, დარღვევის აღმოჩენის შემდეგ კომისიის წევრებმა გამოარკვიეს, რომ ბიულეტენების სამი შეკვრა შეცდომით იყო მაწიმის უბნისთვის გადაცემული.
აღნიშნული ფაქტის შესახებ ინფორმაცია „ნაციონალური მოძრაობიდან“ მაჟორიტარობის კანდიდატმა გურამ კაკალაშვილმა გაავრცელა. მისი თქმით, პარტიის წარმომადგენლებს ამომრჩევლები დაუკავშირდნენ და მიაწოდეს ინფორმაცია, რომ ბიულეტენში მათი მაჟორიტარობის კანდიდატი შეყვანილი არ იყო.
ლაგოდეხის საოლქო – საარჩევნო კომისიის თავმჯდომარის მარიკა გიორგაძის განცხადებით, ბიულეტენების სამი შეკვრა დაილუქა, უბანში კენჭისყრა გრძელდება. „რაც შეცდომით არის ყუთში ჩაყრილი, კენჭისყრა რომ დასრულდება და ვნახავთ, მერე მივიღებთ გადაწყვეტილებას“, – განუცხადა კახეთის საინფორმაციო ცენტრს მარიკა გიორგაძემ.
